2 a Daniw ken ni Anib Miguel, umuna a saringit

’MAYKAN, ANIB...

’maykan, anib, dika agbatbati
kadagitoy batibat agdama a panawen
sika ti saning-i, rupanget ken isem
da ama ken inam
no balabalaenda ti masakbayam,
no bitbitenda dagiti mabitibit
iti sangadakulapan nga aldaw
bareng maikitikitda kenka
tinagilangada a dida natun-oy
guyugoy napugsat nga unnoy
itag-aydanto ti kalis a sika
agependanto ti libro a sika
agbakabakada nga ikarayam
dagiti teggedenda a garakgakmo
bareng nalinlinakto ti baybaymo
inton agluniten ta lulonam
a mangsallukob iti nataltalna a lubong
maturogka latta nupay riniing
da ama ken inam ti parbangon.
’maykan, anib, dika agbatbati…

NOLI S. DUMLAO
Paoay, Ilocos Norte


BANGONEK TI PEDESTALMO
(ken ni anib miguel)

Urnongek dagiti bun-as ti kalgaw a naipempen
iti sagumbi ti kalapaw ken dagiti apgad
ti atab a naidaknir iti kadaratan ket pagtipkelek
ida kadagiti abagak a nangibuat iti dagsen
ti lubong: ditoy a sumaek dagiti ling-et ken lua
ken panawen a katukad ti pedestal nga ipatawidko
kenka. Dimo libian a kas iti panagdawatmo
iti mamador ti arapaapko; ammok nga ipennekto
ti awitko ti amin a dagsenna tapno umagep
dagiti tumengko iti daga. Ibagak manen kenka,
dimo tagibassiten dagiti naridam a barukong
ken dakulapko, nailimogkon ti kabirtudan
nga an-anib ti paria iti gatas ni inam sakbay
a nagtugmok ti linnaaw ken daga. Dinak kagura
iti panangpampagko iti bigao, (kas met iti dengngep
ti moonlight sonata ni beethoven wenno
dungdungnguenkanto nga umukuok iti nakemmo
ket ilallayda kenka ti pudno a maris ti pammateg)
ta mariing ti panunotmo tapno ibuksilanna
ti adu a nagdumaan ti panagpampag ken panagtaep.

Ay, isemamto la ketdi ti agsapa nga agtakderka
ket gaw-atemon ti balbag ti langit kas iti paludipmo
iti anghel a kasigudmo bayat ti panagregreg
dagiti lua ni inam iti barukongko: kas kaniak,
pinanesanna ti panagtakder ti presidente iti dagumpo
dagiti bangkay ti republika ken naganmi. Namnamaek
a nabatokmonton dagitoy a lua, nasumarmonton
dagiti ling-et ket naitalekmon iti angin kas sandi
ti isagutmo nga anges iti lubong. Ammom kadi
a nalpaag ti apuy iti kaunggak a pinasgedan
dagiti gil-ayab ti kalkalsada idi idateng ti pul-oy
ti dayyeng ti panaginatmo?

Ala ket dumanonka iti laem ti dungngomi ken inam
tapno mapagdasigmo dagiti pammateg ti dawa ken asin.

A.S. TABAG
081105