Maudi a McDo

Agkallautangak iti alipuspos dagiti agur-uray
iti pannangan iti McDo; agngilangilak iti kada katay
ti guardia iti sulisog ti Big Mac; pangyaw-awan iti dudungsana
a nakikaykaysa iti lang-es ti balot. Iti panangsirpatko
kadagiti nakapempen a taraon, agbuatit ti bisinko iti panagisem
ti tindera a maul-ulaw iti nakunes a promissory note
iti barukongna.

Ellekan laeng ti papara-Pacquiao ti rupa ni Andres Bonifacio
a naikuskos iti pader nga inisbuan ti artek a tao ken balla
nga aso – kayatda nga ipakaammo iti gimong no kasano
nga inrurumen ti doliar ti kinasimbengda – ket dildilan
ti French fries dagiti nabatbati a dara ti binting a salaknib
ti dayaw ti bolsak.

Diak pay laeng kayat ti agdigos iti bayakabak
saan a gapu ta amangan no umalsa ti darak ket maalta presion
ngem ketdi, diak kayat a pagatapandak dagiti ubbing
nga agideldeldel iti lako a payong kadagiti dyip, fx, bus, bangketa
ken pasdek nga ag-agawek ti wayawayada nga impaay
ti tangatang.

Uray dimmanonen iti paladpad ti lugan ti layus,
agbabaraak iti ngirsi ti aircon no bilangek dagiti tedda
ti boksitko iti dakulapko – mangibatiak iti pagplete
tapno matungpal ti arapaapko no bigat: ti agpasiar
iti maysa a parke.

Pampanunotek no kabaelakon nga awaten ti ania man
a pannusa ti Dios no ilakok ti kidneyk tapno makayawid
man met iti uray sangasupot laeng a pansit iti landlady;
ta no saan, itungpana iti rupak a pinapuskolen ti tapok:
“Agbayad wenno maturog iti kanal?”

Subalitak ngata ti lima a papel nga estoria
ni inang no kasano nga insaldada ti ani
ti panaggagapas iti kanikalima a tawen iti insik
ken inlakoda ti bumaro a nuang iti gagangay
a “Komustakayo? Saluadanyo ti salun-atyo.
Pasensiakayon ta awan pay agawat iti apagturpos”?

Uray kaskasano, makariknaak iti balligi
iti pannakaduktalko nga agsobra iti salapi
ti sensilio; adda ipisokko iti lata ti bulsek.
Amangan laeng no itudona kaniak no sadino
ti kunada a pagturturogan ni Apo Dios.

ARIEL S. TABAG
Villa, Sta. Teresita
3512 Cagayan