Kasarsaritak ti Ladawam
Kasarsaritak ti ladawam: umagepto latta ti saltek iti daga
Uray nangliput ti bayakabak— inibturannan ti angseg
Kadagiti puon ti adigi, kinukotannan ti siudot ti agmatuon
Iti sallabawan. No sapulen dagiti kulalanti ti algarubo
A nangitalimeng iti ritual a ti panagkeppet ket panagtaeng,
Yawisto latta ti sumipnget ti panagsubli iti naggapuan
Ket naridridam a manguray iti gagan-ayan a mangisangbay
Iti baggak. Sungbatannak ti pagorasan, naktangan
A nagur-uray iti senial ti anges iti nakataltalna a bagik—
Ungtannak a saanen a mapaggidiat ti utek ti nalawag
Ken nasipnget wenno biag ken bambanag ta ad-adda
A sipsiputak ti di panaggargaraw dagiti darikmat.
Basolko kadi no imbagam nga agbiagka iti lagip
Ket binirbirokka iti lamina iti kanito a di man la inlili
Ti angin wenno tinagibi ti linnaaw? Adda met ti linas,
Kunam, a namagsinggalot kadata, nakaat-atiddog,
Dinto mapulsot a nangisilpo met iti lagipta iti kalgaw
Ken sabsabong ken panagtutudo a panagtubo ti uong.
Ngem kasano a masurotan ti parmatak ti linas
No aglasat iti taaw, disierto, niebe, ken kapanagan
Ken aggatad ti tunggal tignay ti arapaap iti berde
A kasuratan? Pimmanawka ket awan ti timekmo
A mabalin a surotek; saan a dimteng ti inkarim
A panagawid, nga isangpetnaka ti rimat ti pirak.
Awanka. Kumotan ti tapok ti darepdepko iti linnaaw
Ken pussuak a talibagok ti agekmo; baluden ti saput
Ti dakulapko a nangpetpet iti bitek ti barukongmo.
Ket kasarsaritak ti ladawam nupay lagip laengen
Dagiti balikas— yagek ti saltek iti daga nga awanen
Ti mapasungadanna a senial ti agtaeng nga anges…
ARIEL S. TABAG
Villa, Sta. Teresita,
3512 Cagayan
Bannawag, Setiembre 17, 2007
Uray nangliput ti bayakabak— inibturannan ti angseg
Kadagiti puon ti adigi, kinukotannan ti siudot ti agmatuon
Iti sallabawan. No sapulen dagiti kulalanti ti algarubo
A nangitalimeng iti ritual a ti panagkeppet ket panagtaeng,
Yawisto latta ti sumipnget ti panagsubli iti naggapuan
Ket naridridam a manguray iti gagan-ayan a mangisangbay
Iti baggak. Sungbatannak ti pagorasan, naktangan
A nagur-uray iti senial ti anges iti nakataltalna a bagik—
Ungtannak a saanen a mapaggidiat ti utek ti nalawag
Ken nasipnget wenno biag ken bambanag ta ad-adda
A sipsiputak ti di panaggargaraw dagiti darikmat.
Basolko kadi no imbagam nga agbiagka iti lagip
Ket binirbirokka iti lamina iti kanito a di man la inlili
Ti angin wenno tinagibi ti linnaaw? Adda met ti linas,
Kunam, a namagsinggalot kadata, nakaat-atiddog,
Dinto mapulsot a nangisilpo met iti lagipta iti kalgaw
Ken sabsabong ken panagtutudo a panagtubo ti uong.
Ngem kasano a masurotan ti parmatak ti linas
No aglasat iti taaw, disierto, niebe, ken kapanagan
Ken aggatad ti tunggal tignay ti arapaap iti berde
A kasuratan? Pimmanawka ket awan ti timekmo
A mabalin a surotek; saan a dimteng ti inkarim
A panagawid, nga isangpetnaka ti rimat ti pirak.
Awanka. Kumotan ti tapok ti darepdepko iti linnaaw
Ken pussuak a talibagok ti agekmo; baluden ti saput
Ti dakulapko a nangpetpet iti bitek ti barukongmo.
Ket kasarsaritak ti ladawam nupay lagip laengen
Dagiti balikas— yagek ti saltek iti daga nga awanen
Ti mapasungadanna a senial ti agtaeng nga anges…
ARIEL S. TABAG
Villa, Sta. Teresita,
3512 Cagayan
Bannawag, Setiembre 17, 2007
Comments
Post a Comment