Ung-ungtannak ti Kannag

Impapanko a parabur ti pannakabettak ti sarming—
Bilbilinennak ti barukong a ray-awek ti tunggal parikut
A nagapon iti muging ken rupa nga agdudukot
Iti pannakaammoda a nasursurokon ti wagas
Ti panangaklon a pasetda a kas sadiri ti mulinaw
A nakem. Kaano pay daydi kasla kalawa ti taaw
Ti gundaway? Binirbirokko ti anag ti panangpatas
Iti barbas; kinapateg ti agsubli iti tunggal uged
Ken maris dagiti ladawan a naidalimanek iti petaka,
Naisapit kadagiti libro. Itan, ung-ungtannak ti kannag
Ta likliklikak ti linnaaw, itartarayak ti bayakabak,
Mamallaag: agannadka no malmeska iti pilaw,
Wenno maipumponka iti kanal wenno estero,
Awanto ti bulan wenno dagiti bituen a mangsilaw
Iti agawid a kadkaduam.

Lalaisendak. Kasano nga agawid ti ganggannaet
A kas kaniak? Wenno pagsubsubliendakon iti tapok?
Pagaw-awidendakon iti ubbog? Ngem nakarugrugitak
A pitak. Makasabidongak a danum. No amirisendak,
Nakalaglag-an ti bagi ken kararuak a nakilinongan
Dagiti agngatangata a balikas, aweng ken samuyeng.
Ipagpannakkelko kadi ti itatapawko iti kabambantayan
Dagiti basura? Balligi kadi ti pannakitulagko iti anniniwan
Dagiti nagdadakkel a pasdek babaen ti pagsasao
Ti sipnget, ti angin ken ti maymaysa ngem nasitaksitak
A lubong? Ibagak kadi a pagulidanan ti kinaalibtak
Ti panangabakko iti oras? Karkaritennak ti pagorasan;
Agur-uray ti lugan. Bay-andak kadi lattan nga agdaliasat
Agingga nga agpatinggaakon. Ta no agsubliak itan,
Agpakaasi la ketdi ti bagi ken kararua nga amirisek ida.

Ket kaasiandak kadi no aklonek nga agsarsarmingak
Iti sangapilaw a lua?


Bannawag, Nobiembre 19, 2007