1st Premio Asseng, Maikapat a Lawas ti Salip iti Kurtis

Kablaaw ken ni Prof. Ferdinand N. Cortez ti Tuguegarao, Cagayan a naputongan kas Kumukurtis iti Lawas iti maikapat ken maudi a lawas ti 1st Premio Asseng, Salip iti Kurtis, babaen ti kurtisna a:

Addan ‘ta bulalo

Apagsipnget a naisaang

Kita’mto ‘ta tulangna—

Pata!

Napili ti kurtisna manipud kadagiti sikret a bilang ti kurtis a naisalip iti alas otso iti agsapa ti Nobiembre 26 agingga iti alas singko iti malem ti Nobiembre 30, 2012.

Imbes nga uppat, tallo laeng ketdi ti napili a finalist:

Adda dua a giwang

Napalawlawan ‘ti guraman

Nagallon, nagtupada—

Anian! (Ferdinand C. Cortez)

Ta kulogkulogek

Botelion numero agingga

A rummuar kapkapnekak:

Bingo! (Jobert M. Pacnis)

Adda man nalabsak

Nagdinnungpar a nalalapsat;

Simgiab! Immarayatak—

Nalpas! (Derick Marcel F. Yabes)

Umawat ti Kumukurtis iti Lawas iti Php50.00 a load ken sertipiko ken no adda gasgasatna, adda nayonna inton gibus ti bulan ti salip (aglalaban dagiti mapili nga uppat a Kurtis iti Lawas para iti Kurtis iti Tawen) idinto a dagiti uppat a finalist, umawatda iti sag-20 a load (bassit pay laeng ta awan pay makukuarta ni Asseng).

Kabayatanna, maipaskil dagiti Kurtis iti Lawas iti facebook.com/assengest ta MABALIN a maawis ti imatang ni Asseng a mangpili kas Kurtis iti Tawen ti kaaduan iti like ken/wenno komento (siempre, dagitay positibo laeng a komento; ta amangan no dillaw ti maganab ti dadduma).  

Maitextto kadagiti Kumukurtis no sadino ti pakaangayan ti Seremonia ti pammadayaw. Umawat ti Kumukurtis iti Tawen iti 200 a load idinto ta awanen ti awatenda dagiti tallo pay a finalist.

Dios ti agngina kadagiti amin a kimmurtis. (asseng met laeng)