No Addaak

No addaak ditoy Villa

A nakaikalian ti kadkaduak

Mariknak a maysaak manen a maladaga

Ta nalabit adda birtud ti indadang ni inangko

A pagdigosko ta diakon kabaelan ti lamiis ti away

Maalas-as a kasla tekkab iti abaga dagiti pagrebbengan

Kasla lasi a mayanud dagiti pakadukotan iti ulo

Ti apaganem-em a danum, dengngepenna daytoy pusok

Ket buguanna kadagiti naikalupkop a pungtot

Kaduana nga agawaaw iti law-ang

Nga idi pay punganay, nakalawlawa ti panagawatna

Ken panangawatna kadagiti amin nga ipaawaaw

No addaak iti daytoy a pagtaengan

Maamirisko nga iti uray sadino a disso

Adda lupot ken letra a nailatang iti tunggal maysa

Ket dagiti naagub a bado ken libro

Agikutda manen iti baro nga ayamuom

Kas idi agtutuboak a ti arapaap ket naatap a sanggumay

A di masierto no sadino a kabakiran ti ayanna nagsampagaan

Matakuatak a ti lubong a nagdakiwasan

Nagayusan laeng ti ubbog a namunganay iti tunggal pagtaengan

Sindiak ti anglem. Silnagak ti siled a nagkukotan ti iliw. 

Imdengak ti anges ti nakaparsuaan. Agpatarabayak iti agsapa.

Pumanawak manen. Ta itan ta maysaakon nga agkabannuag

Saanakon a nagawid iti daytoy a balay no di dimmagas laeng

Nupay iti kada rubuat, adda sierto a pagturongan 

A pagtaengan . . .

Marso 4, 2014