Adda Kadagiti Matak Dagiti Bituenmo

Saniata Noriel ken Anib Miguel. (Rinetrato ni Mg Ed, ofm)

“Tatay, Nanay, opis na/ Anib, Ania, tulog pa.”
—Anib Miguel, 3, iti ayug ti “Twinkle, Twinkle, Little Star”

Inaldaw a maklaatak iti napartak a pannakasursurom
Iti galad ti lubong: ammomon ti maysa agingga iti kuarenta
Iti pagsasao a ganggannaet idinto a pitok idi mabalikasko
Ti sangapulo. Bayat ti panangmatmatmatko iti nawalat
A bagim, am-amadek iti bagik no kamatenkanto
Wenno guyodenka tapno makapaggiddanta,
Wenno baklayen, sakruyennak met inton ul-ulodekon
Dagitoy saka iti panangbirokko iti ulo ken barukong.

Pagrukodan met ti kinakapuyko nga amam ta intulokko
A naam-ammom da Spongebob, Dora, Blue nga aso,
Idinto a kabutengmo ti taraok ti kawitan, emmak
Ti kalding ken nuang ni lilongmo. Pakawanennak
Ta timmaoka nga addaak iti nagsapalan nga awan sabali
A pagpilian no di panawanka a nargaan, sangpetanka
A mangtagtagainep iti panagsakaymo iti bukotko—
Maipalamiis ti pizza a sukat ti panaginnadayota.

Ammom kadi no ania a langit ti mariknak iti kaltaang
Ti rabii, malukagka ket yikkismo ti “Tatay, ilaw!”
A puon ti pangmisuotan ni inam kaniak ta nalipatam
A nagtengngaanyo ken adingmo? Gapu kenka, maanagkon
Dagiti pangngarig ni inam ta isut’ namagsinggalot kadata.

Wen, ganggannaet iti tunggal maysa dagiti balikasta
Malaksid iti impatagikuak iti “Dungdungnguenkanto”;
Ngem pasingkedak, adda kadagiti matak dagiti bituen
A mangray-aw kenka iti sardam a paspasungadannak.

Pakawanennak manen ta nakapsutak a mangipatarus
Iti pagsasaom ti panangipategko. Ammuem
A maysa a Saluyot ‘toy amam: adda ti ayatko
Iti nakair-irut nga arakupko. Ken panangibagbagak
Nga intedko aminen kenka: muging, agong, barukong,
Ken amin a bilang, disso ken rukod dagiti sidingko.

ARIEL S. TABAG
Francisco Homes III, Muzon
San Jose del Monte City, Bulacan

Bannawag, Agosto 4, 2008

Ti Makunak: Sagut iti inauna para iti maikatlo a panagkasangayna idi Hulio 22, 2007 (nasurat daytoy sakbayna) ket nairana a Martes ken saan a nakaala iti vacation leave ni inana (ken uray siak metten nupay nalaka laeng koma gapu iti trabahok ken iti mannakaawat unay a boss ken apongko). Gimmatangak latta metten iti cake ngem ti adatna, nakaturog metten idi sumangpetak-- nakaturog pay a pinanawanmi. Pagsayaatanna, kadagiti kakastoy a tawen dagiti ubbing, dagiti nagannak laeng ti mangit-ited iti kaipapanan kadagiti panagkasangay-- panagyaman iti Namarsua gapu iti tallo a tawen a pannakaisagut ni Anib kadakami, iti biangmi (Diak ammo no akinkultura daytoy a tunggal agmaysa ken agpito kano met laeng ketdi ti rumbeng a maaddaan iti padaya). Ngem nangnangruna iti panagkasangayna, adda ditoy dagiti bambanag a pagyamyamanan ken pagdandanagan, a mabalin a gagangay wenno rumbeng laeng iti ama a mangisaksakad iti nasayaat a pagimbagan ti putotna, kaunaan pay met.