Nasarakanka iti Lugan

Inunaak ti oras ken dagiti padak
A makilumlumba tapno natalged,
Nanam-ay ti bagi. Ket nagabayta.

Nakakayang latta— inawidnaka
Ket nagdippit dagiti luppom.
Sangadangan ti baetta,
Ngem iti apagdarikmat a perreng,
Addakan kadagiti naririmat a matak—
Agkurkurnoak metten iti sumsumga
Nga imatangmo.

Ammok nga iti panagkidemmo,
Liniklikam ti mangnamnama iti ayat
Nga iti panagkunam, di maiparbeng,
Wenno iti kappia nga agtalinaed laeng
Nga ar-arapaapem. Binay-am
Ti tunggal lag-oy ti lugan, binay-am
Nga induronduronnaka ti napegges
Nga angin. Sinuktanna ti simcard
Ket inlimedna ti panagteksna.
Pasingkedak nga umun-unaak koma
A mangsippaw iti ulom, salaknibak
Sakbay a maipalek iti landok a tugaw
Iti sangom. Ngem bay-ak koma,
Di gapu ta masimronak iti kinalupoymo,
No bilang nagtinnim-ogkayo:
Duakayo a masaktan ngem panagkunak
Dimon iginggina ti sangkabassit a saniit
Ti bassit a dugol.

Nagkidkidemka ngem agsasallupang
Ti nagdaldaliasat iti panunotmo. Ammok
Ta dika man la nagkir-in no nangsalig
Wenno linumbaanda ti lugan. Nakitak
Daytoy iti kinalidem ti lawlaw ti matam
A di nailemmeng ti nangisit nga eye shadow
Ken dagiti dana ti lua a di napugas
Ti narasay a pulbos.

Idi nauman iti selpon, ginunggonnaka.
Impalagipna nga uray addaka iti opisina,
Asawanaka, ket sika ti babai iti balayyo.
Iti ididissaagna, inuksotna ti singsing.
Nakitana ti panangigigir iti matak,
Namallaag: agpakaammoka, laglagipem,
Sakbay a mangaldawka. Nagtung-edka
Laeng— adayokayon iti tunggal maysa
Nupay agmaymaysaak iti nagbaetanyo.

Nasarakanka iti lugan— nagsennaay,
Nagkidem, nagsadagka iti abagak…

ARIEL S. TABAG
Villa, Sta. Teresita
3512 Cagayan