Kuna ni Haruki a 26 agpababa ti tawen ti maysa a mannaniw

Photo credit:  thejesuitpost.org

Beinte sais met ti tawenko idi nagasawaak

Ket nalabit naiputotkon ti panaglaga kadagiti pangngarig

Ket dagiti aw-awagak iti daniw

Listaan laengen dagiti inaldaw-aldaw a kasapulan

Amiris laengen no ania ti pudno ken sinalawasaw

Kadagiti damdamag a kas iti panamagdadasig

Iti de-kolor ken puraw a labaan

No agsaonak ita, awanan naisabongan a balikas

Ta no makiapaka iti kaingungot

Natarus, awan palpalikaw, ‘tay sumarut iti kaunggan

No makipinnapilitka iti kinainnunam a pasahero

Masapul nga agrasawka, kumaritka iti dinnanogan

Ta ania koma ti serserbi dagiti pangngarig

No lamolamo nga agparang iti sanguanam

Dagiti aginaldaw a pasamak ket ora mismo

Kasapulanda ti pettat a pangrisut iti idiayada

A parikut? Kas ita, pinadasko nga isandi

Ti pangngaaldaw iti daytoy a sinurat

Ket ania ti maganabko? Aggargaradugod a tian,

Nasakit a teltel, agkidmakidmat a panagkita.

Kapada met laeng dagiti rakista ken aktibista

Ti kinamannaniw ket iti panawen ti kinabuangger

Iti panawen a di iginggina ti bisin, panagbuteng

Para iti sabali, ayat para iti bagi ken bukod a kaamaan

Malaksid no ikeddeng a saan a tumaeng ti kinabuangger…

Hulio 16, 2012