Baro a Langa ti Daniw-Iluko ken Wagas ti Panagipeksa iti Mag:net Cafe
Narugian ti pannakaiparang ti baro a langa ti daniw-Iluko ken wagas ti panagipeksa bayat ti maudi a rabii ti Open Mic Gig (OMG!), maysa a regular a pannakapaipabuya ti literatura iti Mag:Net Gallery ni Rock Drilon iti Katipunan, Quezon City.
Inibbatan pay laeng dagiti miembro ken opisial ti GUMIL Filipinas, ti kadakkelan a gunglo dagiti Ilocano a mannurat, dagiti plumada ta ginammatanda dagiti mikropono, sa sinakupda ti entablado tapno ipabuyada dagiti sinuratda wenno sinurat dagiti kabaddungalanda iti maysa a ‘live performance’ idi Agosto 30.
Tallo kadagiti porma ti daniw a naipabuya ti baro— danirak (daniw a rock wenno rock poetry), duata (literal, a ‘siak ken sika’), ken bitniw (bitla a daniw wenno oratorical poetry). Dagiti dadduma a porma ti daniw a naipabuya isu dagiti kadaanan ken manayon a matagtagiben iti Kultura Ilokana a kas iti dallot, pangorona a daniw, daniw a para radio, daniw a para ubbing, ken dandaniw iti parparaangan.
Maysa a langa ti daniw nga Ilokano ti Dallot a kadawyan a mangibinsar iti maysa a sariugma wenno kadaanan nga estoria a kas koma iti “Biag ni Lam-ang.” Idi nagkauna nga aldaw, kastoy met la a porma ti mausar iti idadanon wenno marriage proposal. Iti sabali a biang, ti Duata, maysa a walo a linia a maipaay a kas dedikasion a partuat ni Bert Ugalino iti Hawaii, naisangrat a kas pagdanggayan ti dua nga agbasa. Idinto nga inrugi met ti presidente ti GUMIL Metro Manila, ni Judge Vivencio Baclig, ti Bitniw, bayat ti pabuya iti Mag:Net ta pudno met nga indaniwna ti bitlana. Maysa met a baro a porma ti panagipeksa daytoy Danirak a binukel ken impabuya dagiti ‘di pay unay nataengan a mannurat, da Ariel S. Tabag ken Mighty C. Rasing, kaduada da Dick Francisco ken Melvin Ramos. Mapanpanaganan ti grupoda a Samtoy Band. Ti Samtoy, pakayababaan ti Saomi Ditoy nga imparparugi daydi Apo Leon Pichay, nupay ti banda adda sabali a kaipapananda iti nasao a balikas-- Samiwengmi Ditoy.
"Nainaw ti Danirak manipud iti panagsapul kadagiti sabali a porma ti naindaniwan a panagipeksa,” kasta ti imbaga ni Rasing kadagiti nagbuya sakbay nga akmenna ti umuna a danirak a napauluan “Agekmo iti Nasam-it a Rabii” nga isu met la ti nangisurat. Maysa met a satiriko a daniw ni Tabag, ti “One for the Road” (Maysa Pay Satay Agawid) ti insarunona nga impabuya ti Samtoy.
Karaman kadagiti nagbasa iti daniw da Gawad CCP for Literature recipient Juan S.P. Hidalgo, Jr., 2009 UMPIL Awardee Dr. Paul Blanco Zafaralla, 2010 UMPIL awardee Ric Agnes, GF President Elizabeth Raquel, GMM President Judge Vivencio Baclig, Linda Bulong, Aida C. Tiama, Jovito F. Amorin, Benn Cabacungan, Leo S. Fagaragan, Ma. Rose Cabie, Rudy Taan, Avelina Fe Camacho, Rudy Contillo, Dr. Zita Fagaragan, Ariel S.Tabag, Sherma E. Benosa, ken Mighty C. Rasing. Napan met nagbuya da GF Past President Dioniso Bulong ken GMM Director Simeon Berroy.
Malaksid kadagiti nadumaduma a langa ti daniw, naipatayab met dagiti kanta nga Ilokano ken maysa a kanta ti Itneg. Nangipangngeg met ni Prof. Honor Blanco Cabie iti maysa a samiweng Espaniol nga inikkanna iti Iluko a balikas. Innalana metten ti gundaway a nangiwaragawag iti baro a librona a nakaukkonan dagiti sonetona, a napauluan “Rhymes and Roses” (Dagiti Rima ken Dagiti Rosas).
Daytoy ti umuna a gundaway nagpabuya ti GF iti makunkuna a ‘gig’. Kunada a saan la ket kano a daytoy ti maudi. Mangrugi iti daytoy a Setiembre, agbalinton a mainstay ti GUMIL ta agpabuyada iti kada maikadua a Martes iti tunggal bulan, iti Conspiracy Garden Café a masarakan iti 59 Visayas Avenue, Project 6, Quezon City.
Inton Setiembre 14, dagiti daniw iti kaudian nga antolohia ti naimaldit a libro dagiti Ilokano a mannaniw ti GF a napauluan ti “Kastoy nga Imbunubonmi dagiti Balikas” ti mausar a maidaniw kasta met ti baro a piesa ti bitniw, duata ken dallot. Baro met ti material nga ipakayabkab ti Samtoy Band. Madama itan a mangiringringpas ti banda kadagiti danirak a mangbukel iti album a namnamaenda a mayalnag iti kabiitan a panawen.
Ti GF gig iti OMG! ken dagiti sumarsaruno pay a gig iti Conspiracy (Conspi Writers Night) naipatungpal babaen ti panangilungalong ni dati nga UMPIL chair, Prof. Vim Nadera, ta inrugina ti kastoy a literary gig lima a tawenen ti napalabas. Ni Nadera ti sigud a host ti OMG!, ngem kalpasan iti sumagmamano a tawen, inallukoyna dagiti gunglo ti literatura nga nga agpabuya ken ag-host a regular.
Iti panagserra ti Mag:Net Café idi Agosto 30, nakisarita ni Nadera iti Conspiracy tapno ituloyda ti konsepto ti OMG! a nagbalin a gundaway ti pannakaiparang dagiti literary performances kasta metten dagiti workshop. Dagiti gunglo ti literatura ken agpabuya nga agbalin a mainstay iti Conspiwriters, a maipabuya iti kada Martes mairaman ti Las Bungangeras ken ti Foes Band (umuna a Martes), GUMIL (maikadua a Martes), LIRA wenno ti Linangan sa Imahen, Retorika, at Anyo (maikatlo a Martes) ken sabali pay a grupo iti tunggal maikapat a Martes.
“Malaksid iti panagbasa iti daniw ken panagbasa iti estoria, mairamanen kadagiti pabuya iti Conspiracy dagiti sala, musika, teatro ken dadduma pay a pakaipeksaan ti literatura,” imburay ni Nadera. (Sherma E. Benosa)
Inibbatan pay laeng dagiti miembro ken opisial ti GUMIL Filipinas, ti kadakkelan a gunglo dagiti Ilocano a mannurat, dagiti plumada ta ginammatanda dagiti mikropono, sa sinakupda ti entablado tapno ipabuyada dagiti sinuratda wenno sinurat dagiti kabaddungalanda iti maysa a ‘live performance’ idi Agosto 30.
Tallo kadagiti porma ti daniw a naipabuya ti baro— danirak (daniw a rock wenno rock poetry), duata (literal, a ‘siak ken sika’), ken bitniw (bitla a daniw wenno oratorical poetry). Dagiti dadduma a porma ti daniw a naipabuya isu dagiti kadaanan ken manayon a matagtagiben iti Kultura Ilokana a kas iti dallot, pangorona a daniw, daniw a para radio, daniw a para ubbing, ken dandaniw iti parparaangan.
Maysa a langa ti daniw nga Ilokano ti Dallot a kadawyan a mangibinsar iti maysa a sariugma wenno kadaanan nga estoria a kas koma iti “Biag ni Lam-ang.” Idi nagkauna nga aldaw, kastoy met la a porma ti mausar iti idadanon wenno marriage proposal. Iti sabali a biang, ti Duata, maysa a walo a linia a maipaay a kas dedikasion a partuat ni Bert Ugalino iti Hawaii, naisangrat a kas pagdanggayan ti dua nga agbasa. Idinto nga inrugi met ti presidente ti GUMIL Metro Manila, ni Judge Vivencio Baclig, ti Bitniw, bayat ti pabuya iti Mag:Net ta pudno met nga indaniwna ti bitlana. Maysa met a baro a porma ti panagipeksa daytoy Danirak a binukel ken impabuya dagiti ‘di pay unay nataengan a mannurat, da Ariel S. Tabag ken Mighty C. Rasing, kaduada da Dick Francisco ken Melvin Ramos. Mapanpanaganan ti grupoda a Samtoy Band. Ti Samtoy, pakayababaan ti Saomi Ditoy nga imparparugi daydi Apo Leon Pichay, nupay ti banda adda sabali a kaipapananda iti nasao a balikas-- Samiwengmi Ditoy.
"Nainaw ti Danirak manipud iti panagsapul kadagiti sabali a porma ti naindaniwan a panagipeksa,” kasta ti imbaga ni Rasing kadagiti nagbuya sakbay nga akmenna ti umuna a danirak a napauluan “Agekmo iti Nasam-it a Rabii” nga isu met la ti nangisurat. Maysa met a satiriko a daniw ni Tabag, ti “One for the Road” (Maysa Pay Satay Agawid) ti insarunona nga impabuya ti Samtoy.
Karaman kadagiti nagbasa iti daniw da Gawad CCP for Literature recipient Juan S.P. Hidalgo, Jr., 2009 UMPIL Awardee Dr. Paul Blanco Zafaralla, 2010 UMPIL awardee Ric Agnes, GF President Elizabeth Raquel, GMM President Judge Vivencio Baclig, Linda Bulong, Aida C. Tiama, Jovito F. Amorin, Benn Cabacungan, Leo S. Fagaragan, Ma. Rose Cabie, Rudy Taan, Avelina Fe Camacho, Rudy Contillo, Dr. Zita Fagaragan, Ariel S.Tabag, Sherma E. Benosa, ken Mighty C. Rasing. Napan met nagbuya da GF Past President Dioniso Bulong ken GMM Director Simeon Berroy.
Malaksid kadagiti nadumaduma a langa ti daniw, naipatayab met dagiti kanta nga Ilokano ken maysa a kanta ti Itneg. Nangipangngeg met ni Prof. Honor Blanco Cabie iti maysa a samiweng Espaniol nga inikkanna iti Iluko a balikas. Innalana metten ti gundaway a nangiwaragawag iti baro a librona a nakaukkonan dagiti sonetona, a napauluan “Rhymes and Roses” (Dagiti Rima ken Dagiti Rosas).
Daytoy ti umuna a gundaway nagpabuya ti GF iti makunkuna a ‘gig’. Kunada a saan la ket kano a daytoy ti maudi. Mangrugi iti daytoy a Setiembre, agbalinton a mainstay ti GUMIL ta agpabuyada iti kada maikadua a Martes iti tunggal bulan, iti Conspiracy Garden Café a masarakan iti 59 Visayas Avenue, Project 6, Quezon City.
Inton Setiembre 14, dagiti daniw iti kaudian nga antolohia ti naimaldit a libro dagiti Ilokano a mannaniw ti GF a napauluan ti “Kastoy nga Imbunubonmi dagiti Balikas” ti mausar a maidaniw kasta met ti baro a piesa ti bitniw, duata ken dallot. Baro met ti material nga ipakayabkab ti Samtoy Band. Madama itan a mangiringringpas ti banda kadagiti danirak a mangbukel iti album a namnamaenda a mayalnag iti kabiitan a panawen.
Ti GF gig iti OMG! ken dagiti sumarsaruno pay a gig iti Conspiracy (Conspi Writers Night) naipatungpal babaen ti panangilungalong ni dati nga UMPIL chair, Prof. Vim Nadera, ta inrugina ti kastoy a literary gig lima a tawenen ti napalabas. Ni Nadera ti sigud a host ti OMG!, ngem kalpasan iti sumagmamano a tawen, inallukoyna dagiti gunglo ti literatura nga nga agpabuya ken ag-host a regular.
Iti panagserra ti Mag:Net Café idi Agosto 30, nakisarita ni Nadera iti Conspiracy tapno ituloyda ti konsepto ti OMG! a nagbalin a gundaway ti pannakaiparang dagiti literary performances kasta metten dagiti workshop. Dagiti gunglo ti literatura ken agpabuya nga agbalin a mainstay iti Conspiwriters, a maipabuya iti kada Martes mairaman ti Las Bungangeras ken ti Foes Band (umuna a Martes), GUMIL (maikadua a Martes), LIRA wenno ti Linangan sa Imahen, Retorika, at Anyo (maikatlo a Martes) ken sabali pay a grupo iti tunggal maikapat a Martes.
“Malaksid iti panagbasa iti daniw ken panagbasa iti estoria, mairamanen kadagiti pabuya iti Conspiracy dagiti sala, musika, teatro ken dadduma pay a pakaipeksaan ti literatura,” imburay ni Nadera. (Sherma E. Benosa)
Comments
Post a Comment