MAKIKINKINNAMATANAK

Makikinnamatanak a kanayon—

   nupay saanak nga agtaray

   diak kasapulan ti nalawa nga espasio

A pangtingitingan iti andur, alibtak ken paspas

   ‘tay kasla addada agballa nga aso iti likudan

wenno agbuangger a kabalio— sindadaan a mangdangran kaniak 

   ‘tay di masultipan tapno agrubuat a pumegges

Nga agngudo iti naituding a uged a mapalpalakpakan.


Daytoy a pannakikinnamatan

   addaanak ketdi iti bukod a dana

   iti bukod a kasalisal

   siak laeng ti makaammo

   bukodko ti amin: ti bagik ti makilumba ken ti kalumba

   ti gunggona

   ti pangrugian ken pagnguduan.

 

Daytoy a pannakikinnamatan

   diak kukua ti gunggona iti panagballigi

   ngem kukuak ti uyaw iti pannakapaay.

 

Ngem saan a diak makikinnamatan.

Ta iti panagsarimadengko, adda maputed a dalan

Mabalin a mayaw-awan dagiti sumaruno kadagiti tugotko 

Ta mabalin a maabbonganda kadagiti ruot ken lanut

Pagluniten ti tapok wenno ti tudo ken layus.


Makikinnamatanak latta iti angin ken danum

   iti anniniwanko, iti panagbutbutengko—

Awan sardayna agingga a kakinnamatko payen ti bukodko nga anges.


Ngem saan a diak makikinnamatan

Iti itattawwek ti dumteng-pumanaw a kanito, 

Iti panagtayab itan ti masakbayan— a kasla ketdin nagpasugnod

A dinan kayat ti pagaw-at isu a masapul daytoy a pannakikinnamatan 

A mangbirok ken mangtiliw kenkuana.

 

Panangsapul met daytoy iti naganko, iti pudpudno a naganko

Ken pudpudno a nakaibaonak ditoy, wenno no apay nga addaak ditoy

Kas rinet laeng iti sibubukel nga uniberso.

 

Panangsarak daytoy ken panangtiliw kadagiti sungbat dagiti burburtia 

A mangpaspasged iti gagarko a dumanon iti ungto ti bullalayaw.

 

Ngem saan laeng daytoy a panangsapul iti bullalayaw, 

Ketdi panangiballasiw kadagiti adda iti likudak— mangnamnamada 

   ti balligik, balligida

   ti pannakapaayko, pannakapaayda.


Isu nga agnanayonak a natibker

Awan siled ken panawen iti panaglulok ti puso ken panunot

Dagiti lasag, urat ken dara, agnanayon a siriridam, sikikidser.

 

Makikinnamatanak tapno saanak a mabati

Saanak a basta lattan nangan iti tapok

Saanak a basta limmabas iti daytoy a lubong

Ketdi, nangtunton iti kaimudinganna.


--JOBERT M. PACNIS



(Maikatlo a Gunggona iti Salip iti Daniw ti 1st Saniata Prize iti 2015. Dagiti Hurado: Cles B. Rambaud, Roy V. Aragon ken Ariel S. Tabag.)


Comments

Popular posts from this blog

VOICE TAPE

ARIEL SOTELO TABAG

Samiweng ni Ayat