TI KOMPOSITOR DAGITI KANSION TI TUDO

1: Arubuob

Ammok daytoy karkarna a musika

a dina sursuroten ti ania man a linteg

wenno notasion, maysa a sala nga awanan tignay,

simponia nga awanan paset.

Umay a nakalitlitnaw kadagiti saniata ti kaltaang,

kadagiti kayo nga agir-irair iti puyupoy,

iti lawag ti bulan a naabbongan kadagiti dalluyon.

Aggalgalangogong iti lapayag

iti kanito nga agsabat dagiti ramayta,

sa ti koro dagiti barisawsaw a bituen,

aggiddato nga agkansion.

Kumeddel a bisin, linia iti himno dagiti billit,

alimunumon iti maysa a lallay.

Umal-allangogan kadagiti dayyeng ti taaw

a maitoktokar no nepnep, nasulit a pinartuat

ti Kompositor dagiti kansion ti tudo.

Agar-arasaas sagpaminsan iti lengguahe

a nabangonak, nakakaskasdaaw a salamangka,

napukpukaw idi nagsarday ti kinaubing,

nga indulinko iti lengleng ti lagip.

 

Kepkepkepak ditoy barukongko, daytoy

saringit ti maysa a kansion,

a diak inmula tapno diak labsingen daytoy

nasantuan a daga. Ditoy, agkansionak

kadagiti panagraem iti ayat

aramat ti natalna a timek, ti nagartem a kinatalna.

 

2: Arbis

Nakakaskasdaaw, buybuyaenta

dagiti narasi a salay ti lawwalawwa

a pumalpalong kadua ti tunggal nota

iti naannayad a maregregreg nga arbis;

dagiti salay, aglallay, a kas agkilkilling a teklado,

a kas agay-ayab a timek

iti naingpis nga angin, maysa a karayo

para kadagiti nararagsak a bagyo,

bumimbingor a ragsak iti tunggal anges.

Sumusom a karaniagan

ti agtedtedted iti kidaymo, ayatko,

idi dinaydayawta ti agpakpakada a kalgaw,

dagiti kansionna, naikulkol iti nasged nga arakupta.

 

Nakakaskasdaaw, buybuyaenta

ti panagusaw ti amaris,

iti panagiyar-arasaas ti kaudian a nota,

ken buybuyaenta a mapugsapugsat dagiti salay

iti tunggal puyot ti nalamiis a dapag iti Hunio.

 

3: Lua

Maslepta iti likido a sinamar, naggapu

iti langit a duduogan ken baro,

dagiti lua ti lawag,

agkankanaganag a kas iti panagbabagyo,

agar-arikap  a dumarup iti rag-o.

 

Ikantamto manen

dagiti kansion ti tudo.

 

4: Didigra

Idi kanito nga agbalbalin a layus

ti parais iti tengngat’ aldaw, maysa nga ummong

ti nagtipon iti aglawlaw, naumel a kas ayup.

Mangrugrugi a malmes iti limdo ken ladingit

dagiti baknang kadagiti luganda a nabaldado

iti tengnga ti trapiko; mariribukan dagiti nakalugan

iti dyip a kas dagiti ayup iti tangkal, ta

ti oras ken trapiko, saan nga agkutkuti.

Nagaribungbong gapu iti simponia ti didigra,

naipada ti amin iti dayaasna.

 

Kimat ken gurruod!

Nakakatkatawa a darikmat, awan serbina!

Makibalbalubalak a malapdan ti essem

a tumaray ken mabuniagan iti nalamiis a tayudok.

Immay isu a nangalawngaw ken mannakibiang la unay.

Nalamiis nga ikkis ti Marso,

awan namnama a magusgusnaw ti kalgaw

iti panunotko. Nasapa la unay!

(Namnamaem no Hulio; naan-anay a maregreg

ti tudo into no kuan.)

Bagbagaannak no kasano kapiman

ti kinaasinok, naigalut ken mapmapnek ditoy,

ket ti kinatured, adda idiay kayabas

a kas nakalabus, nawaya a kas ubing.

Karitem! Paneknekam! kuna ti tudo,

bumarbanerber a kabuyog ti napegges nga angin.

Indayamudongko ti ulok, nagmadiak iti ayab,

ti trapiko sangkabassit nga agkutkuti idiay ruar,

sa inalimonko ti kape, masursuron

iti angot ti kinatakrotko.

 

5: Nepnep

Ti dagsen ti lubong, Nakkong, ammok la unay;

ti pagarupko idi ubingak, ti liday ket baklay laeng

dagiti nataengan. Ngem immay a nasapa

a kas iti tudo ti nepnep ita a tawen.

 

Immay a mabisbisin

iti bulan ken kinasirib, maysa a kulibangbang

a napilit a rummuar iti balayna,

pinilit ti kinapanglaw a maisumngay

a di pay naluom, di pay pudno ti pigsa,

ket ginunggonna ti nalulukneng pay nga abagam

iti dagsen ti lubong. 

 

Napilit nga agbagkat iti biag.

Napilit a manglukat iti rikep ti patay.

 

Sinuruannak nga agdung-aw, Nakkong.

Sinuruam ti lubong nga agdung-aw, ngem dagiti ima

a mangaywan koma ket mangliwliwa a naladawen,

nakaladladawen.

Asino ti makaammo iti kumedkeddel a liday?

Awan duadua, ammo dagiti ubing

ngem mailemmengda iti ay-ayam ken lugnak iti nepnep,

nalabit, ammoda nga isu ket maysa a lunod

a mabagkat laeng dagiti dakkel.

 

Ngem immay a nasapa a kas iti nepnep ita a tawen,

a nanglemmes kadagiti saringit a pagay idiay kelleng.

 

6: Tudo ti Kurad

Awan ti bullalayaw idi

nailukat apagbiit dagiti ridaw ti mata, ket

nataldiapanta ti langa ti tunggal maysa.

Maysa a sirmata iti kaltaang, wenno

darepdep iti tudo ti kurad, nagsabatta

iti kursada ti nakem, ti kararua,

apagbiit, apagkirem. Sa, naawan

a kas dagiti tagainep

iti nagbeddengan ti parbangon ken agsapa.

Ngem addaka iti agrayabrayab a sanga dagiti kayo,

mariknaka kadagiti arasaas

ti nasaligemgem nga angin-baybay,

mangngegko ti katawam iti kanakteel ti dayegdeg.

Sa, maawan a kasla lagip a naiwagsi.

Sa, mabati laeng ket pigis ti maysa a lallay

nga ikaykay-ab ti angin iti gumaygayyagay a tudo.

 

Maslepta iti likido a sinamar, naggapu

iti langit a duduogan ken baro,

dagiti lua ti lawag,

agkankanaganag a kas iti panagbabagyo,

agar-arikap a dumarup iti rag-o.

 

Inton sumaruno a panagsasabat, ngarud.

 

7: Bettaang

A kas idi rugi, ita a kalpasanna,

maysa a timek ti mangikansion iti kinaawan, kinaadda,

agal-allangogan iti kumlaat ti angin

dagiti ladingit ken ragsak, biag ken patay,

maysa a panagsukatsukat. Ti kaudian a nota

ti mangisenias iti bettaang, mangitulod

iti balbag a langit, iti kanibusanan

ti panawen ti dayasadas, tapno

mapartuat dagiti sumarsaruno a kansion.

 

Inta palakpakan ti Kompositor.

 

Ikantamto manen

dagiti kansion ti tudo.

 

--RIA REBOLLEDO

 

(Maikatlo a Gunggona iti 2^nd Saniata Prize Salip iti Daniw iti 2016. Dagiti Hurado: Cles B. Rambaud, Roy V. Aragon, ken Ariel Sotelo Tabag.)