Iti Nagbabaetan Dagiti Pasdek

Magnaak iti nagbabaetan dagiti pasdek
Akikid a kas kadagiti tambak ken desdes
Ta dagiti nalalawa a kalsada
. para kadagiti agsasanggala a lugan
. sanikua dagiti pilid, rugit ken asuk
. pakatiliwan dagiti agbasakbasak

Narigat ti aglabsing ta ganggannaetkami amin
Nupay agpapada dagiti sapatos, bado ken antiparra
Agsusupadi dagiti askaw, turongen ken gagem
Ta masansan a saligandak, sikilendak, iwadagdak

Kasalisalmi ti ania man nga elektroniko kas iti escalator
Agingga nga agbalinkamin a makina iti tunggal maysa
Aggunay iti tunggal pisel kadagiti de-buton nga utekmi
Agpulpuligos ket di mamira ti nagbaetan ti lawag ken sipnget.

Agduduma ti maris, rukod, ken lawag dagiti bituen—
Magawgaw-at ngem naynay a sapsapulek ti tangatang
Kunada: agbatayka iti lulonan dagiti pasdek
Ket no marukodmo ti arapaapna, makitamon ti langit.

Ania ti bileg ti anglem kadagiti agsasanggala a kimat,
Gurruod ken asuk? Malmes ti dung-aw kadagiti agsisimparat
Nga awag ket matdaak nga agmaymaysa— tumaliaw, sapulek
Ti naggapuak— saruten dagiti matak dagiti pasdek ken lugan

…umkisak:

Naisupadi dagitoy nagbabaetan dagiti pasdek
Kadagiti tambak ken desdes— akikid
Ngem nagbebedngan laeng
. dagiti napanayag a talon ken bangkag
. a sanikua dagiti agkakasinged
. tunggal disso, siiiliw a mamasangbay

ARIEL S. TABAG