Masaker iti Warnakan Tallo Aldaw Sakbay ti Agtapos ti Bulan
NAKABARDAY kadagiti diario: ama a nangputot iti putotna; ina a nangsamal kadagiti annakna, babaonen a nanglitson kadagiti amongna…
Daytoy ti agdama a panunot ken aw-awid dagiti umili iti siudad, ken— kas kuna ti dadduma— dagiti negosiante met laeng nga among dagiti agiwarwarnak.
Idinto a dagiti agparpartuat iti samiweng, agtitiponda kadagiti sirok dagiti agrakrakaya a pasdek a masansan a pagdudukotan dagiti polis tapno maiparammag nga adda ar-aramidenda malaksid iti makilumba iti agdadagsen (wenno iti mangpadakkel kadagiti boksitda). Di makapagkitakit dagitoy musiko ta aruatenda pay laeng, pammanekneken a dida maibilang itoy a gimong nga iturturong dagiti agpampanunot a polis: ti ngudo ti paltog ti usarenda a pangipatungpal iti paglintegan.
Dagiti pintor, iti sabali a bangir, ibistida laengen kadagiti diding dagiti imahinasionda ngem iti aramiden a mantel dagiti politiko wenno negosiante nga agparparikut a makaduktal iti kapartakan a paggastosan.
IDINTO nga ipadamagda iti away ti panangsamalda kadagiti siba sakbay a makauna dagitoy kadagiti dawa. Wenno ti panangtabukolda kadagiti billit-tuleng.
Ipakaammoda pay a nakasagana ti sarusar a pagilebbenanda iti apit bayat a sensilio ti ididiaya pay laeng dagiti negosiante.
Dimi ammo ti malais ket ad-adda a pananguyot dayta kadakami.
DITOY, magmagnakami a rurog— dakami a mangmangged iti pagwarnakan. Saankami ketdi nga agdidinnungpar kadagiti pasilio, lansangan ken eskinita nupay agsasallupang dagiti kayatmi a papanan, aramiden, ken iwaragawag: agsasarunokami a kas iti agpaparut iti ngipen a puon ti ag-agalen ti sibubukel a bagimi. Ngem sadino la ditan ti simmuksuksokan ti datdatlag ta uray no nakaparuten ti dentista, agtalinaed ti binukbok a ngipen iti sangi.
Agtultuloy latta ti panagdaliasatmi: kalumbami dagiti ubbing a mangkamat iti kutit ti dyip; kasalisalmi dagiti peon a mangkalabkab iti pasdek; kainnislangmi dagiti ahente ti awag tapno agkikinnaawatankami; lasatenmi dagiti dalan dagiti estudiante; sukisokenmi ti biag dagiti propesor, doktor, nars, inhiniero, soldado, politiko, artista…
AGGIGIDDAN ti idadateng dagiti abiso iti pannakaputol ti koriente, danum, cable TV, broadband, prepaid a selpon.
Umawag ni kaingungot ket ipalagipna nga awanen ti gatas ni buridek ken saanen a mabalin ti promissory note ni inauna, awanen ti nagyan ti gasul, awanen ti makiraud iti pagbagasan.
Taliawenmi ti kinsenas ngem simpoken iti nakapuspuskolen a tapok ken asuk ti siudad.
Ket aggigiddankami a matulid…
AWAN duliananmi kadagiti kadete a siaalibtak ken siuulimek a tumakder nga agsasaruno iti maysa laeng a sao ti amongmi.
Awan ngarud dagiti naganmi iti parupa. Wenno iti obituario.
Ta iti maikatlo nga aldaw kalpasan ti pannakamasakermi, kayatmi ti agungar.
Tapno agirakurak.
Ken makapasangbay ti pamiliami iti naimbag a damag.
ARIEL S. TABAG
(Naka-justify koma amin nga igidna; daksanggasat ta diak maurnos.)
Daytoy ti agdama a panunot ken aw-awid dagiti umili iti siudad, ken— kas kuna ti dadduma— dagiti negosiante met laeng nga among dagiti agiwarwarnak.
Idinto a dagiti agparpartuat iti samiweng, agtitiponda kadagiti sirok dagiti agrakrakaya a pasdek a masansan a pagdudukotan dagiti polis tapno maiparammag nga adda ar-aramidenda malaksid iti makilumba iti agdadagsen (wenno iti mangpadakkel kadagiti boksitda). Di makapagkitakit dagitoy musiko ta aruatenda pay laeng, pammanekneken a dida maibilang itoy a gimong nga iturturong dagiti agpampanunot a polis: ti ngudo ti paltog ti usarenda a pangipatungpal iti paglintegan.
Dagiti pintor, iti sabali a bangir, ibistida laengen kadagiti diding dagiti imahinasionda ngem iti aramiden a mantel dagiti politiko wenno negosiante nga agparparikut a makaduktal iti kapartakan a paggastosan.
IDINTO nga ipadamagda iti away ti panangsamalda kadagiti siba sakbay a makauna dagitoy kadagiti dawa. Wenno ti panangtabukolda kadagiti billit-tuleng.
Ipakaammoda pay a nakasagana ti sarusar a pagilebbenanda iti apit bayat a sensilio ti ididiaya pay laeng dagiti negosiante.
Dimi ammo ti malais ket ad-adda a pananguyot dayta kadakami.
DITOY, magmagnakami a rurog— dakami a mangmangged iti pagwarnakan. Saankami ketdi nga agdidinnungpar kadagiti pasilio, lansangan ken eskinita nupay agsasallupang dagiti kayatmi a papanan, aramiden, ken iwaragawag: agsasarunokami a kas iti agpaparut iti ngipen a puon ti ag-agalen ti sibubukel a bagimi. Ngem sadino la ditan ti simmuksuksokan ti datdatlag ta uray no nakaparuten ti dentista, agtalinaed ti binukbok a ngipen iti sangi.
Agtultuloy latta ti panagdaliasatmi: kalumbami dagiti ubbing a mangkamat iti kutit ti dyip; kasalisalmi dagiti peon a mangkalabkab iti pasdek; kainnislangmi dagiti ahente ti awag tapno agkikinnaawatankami; lasatenmi dagiti dalan dagiti estudiante; sukisokenmi ti biag dagiti propesor, doktor, nars, inhiniero, soldado, politiko, artista…
AGGIGIDDAN ti idadateng dagiti abiso iti pannakaputol ti koriente, danum, cable TV, broadband, prepaid a selpon.
Umawag ni kaingungot ket ipalagipna nga awanen ti gatas ni buridek ken saanen a mabalin ti promissory note ni inauna, awanen ti nagyan ti gasul, awanen ti makiraud iti pagbagasan.
Taliawenmi ti kinsenas ngem simpoken iti nakapuspuskolen a tapok ken asuk ti siudad.
Ket aggigiddankami a matulid…
AWAN duliananmi kadagiti kadete a siaalibtak ken siuulimek a tumakder nga agsasaruno iti maysa laeng a sao ti amongmi.
Awan ngarud dagiti naganmi iti parupa. Wenno iti obituario.
Ta iti maikatlo nga aldaw kalpasan ti pannakamasakermi, kayatmi ti agungar.
Tapno agirakurak.
Ken makapasangbay ti pamiliami iti naimbag a damag.
ARIEL S. TABAG
(Naka-justify koma amin nga igidna; daksanggasat ta diak maurnos.)
Comments
Post a Comment