Iti Panaginnagaw ti Sipnget ken Lawag

Mamatiak itan nga iti panaginnagaw
Ti sipnget ken lawag
Agsardeng iti apagkirem ti panagtayyek ti lubong
Ta naimatangak:

. ti yaagek ti alutiit iti daga;
. ti panagbatay ti pagassawaan a kamanokan iti sanga;

. ti panagngatingat ti nakauldag a nuang
. iti sirok ti mangga;
. ti pannakaalay-ay dagiti dalikan
. a manglinay iti innapuy;

. ti panangkibin ti ama, a limmidok iti tersena,
. iti bisikleta a nagsakayan ti putotna nga inauna
. a nangsukon kenkuana ken mangisapsapata
. a lumbaan daytoy ti bulan ken ti anniniwanna;

. ti isasango iti taltalon ti agtutubo nga ina
. a nakaubba iti maladaga, ulit-ulitenna:
. “Umaykan, Unior, dika agbatbati!”;

. ti panagsardeng ti agus ti karayan
. ta siuulimek nga inaklon ti taaw
. ti nalabaga a maris ti tangatang;

. ti pannakaigibus ti samiweng
. dagiti tumatayab ta agay-ayaben
. dagiti kawayan, dungon, kallupit;

. ti pannakairugi ti konsierto
. dagiti riari, kuriat ken kullaaw
. ta addaan met ti sipnget iti parambak;

. ti pannakagangat manen iti temtem
. tapno agbangabanga dagiti simotsimot
. ket saanda nga ay-ayamen ti nalupoy
. nga apuy ti kandela, nga iti panaglua daytoy
. aglulumba met a maregreg dagiti perlas
. iti pingping ti nagdalungdong a baket;

. ti panaglinnaga dagiti ramay ket sitatalinaay
. dagiti dakulap a nangakkub iti barukongko…

ARIEL S. TABAG