DANIW A TINIGNAY NI NERUDA
Asinoka Koma?
(Dispensarennak, Pablo Neruda)
Kunam la no asinoka
A nagbirbiragsot ditoy kaunggan
Ti natalinaay a pusok
Ket impaturaymo nga immalsa
Dagiti ur-uratko agingga a nalmes
Dagitoy bitek— agsungsung-ab
Kunam la no asinoka a kalalaingan
A nangtikaw iti naulimek a panunot
Ket addaka uray kadagiti tagainep
A maibislibislin kadagiti maris ken ayamuom
Dagiti sabsabong ti rosas ken lirio
A kunam la no kapadadaka a di manglaylay
Nalabit ipagarupmo nga adda pay iti agongko
Ti ayamuom a kimmayetket kaniak
Manipud pannakasagidko iti atiddog,
Pangulkuloten a buokmo. Nagriroka
Ta binay-akon nga intayab ti abagat
Ket naitanemen iti tukot daytoy lubong.
Nalabit ipagarupmo a mangmangngegko pay
Dayta timekmo nga agarup alun-onen payen
Dagiti dalluyon a nangipaanudam
Kadagiti inkurkur-itko a pammadayaw
Iti kinasam-it ken kinailailo dagiti balikasmo.
Saan! Bassit-usitdan nga arasaas,
Nga arimpadek kadagiti kaltaang ti rabii.
Makitkitak kadi pay ti rupam kadagiti ulep
Ta kas kapartakdan nga agawaaw ti lagipmo?
Wen, kas iti panagawaaw ti pait ti nabaawan a kape,
Ti nakillabban a kinilnat a balang a paria.
Kaing-ingasmo kadi pay, aya, dagiti nalalapsat
A bida a babbai kadagiti buyaek a romantiko
A pelikula? Addaka kadi pay, aya, kadagiti linabag
Dagiti linia dagiti nasasam-it, agun-unnoy a musika?
Nagriroka no baliksek pay ti naganmo tunggal agrukbabak
Iti kinaisangsangayan dagiti amin a bambanag a naimbag
Uray pay ngata agplastarka a higante a lamina
Iti tawa a nangtantannawagak kenka, dikan makita
Nagriroka no ipagarupmo a kadagiti panagmaymaysak
Kadagiti nasipnget a dalan, nalamiis a parbangon,
Kadagiti awanan pagturongan a biahe, kawaw a kanito,
Sapsapulenka, a sapsapulenka…
Hulio 26, 2011
(Dispensarennak, Pablo Neruda)
Kunam la no asinoka
A nagbirbiragsot ditoy kaunggan
Ti natalinaay a pusok
Ket impaturaymo nga immalsa
Dagiti ur-uratko agingga a nalmes
Dagitoy bitek— agsungsung-ab
Kunam la no asinoka a kalalaingan
A nangtikaw iti naulimek a panunot
Ket addaka uray kadagiti tagainep
A maibislibislin kadagiti maris ken ayamuom
Dagiti sabsabong ti rosas ken lirio
A kunam la no kapadadaka a di manglaylay
Nalabit ipagarupmo nga adda pay iti agongko
Ti ayamuom a kimmayetket kaniak
Manipud pannakasagidko iti atiddog,
Pangulkuloten a buokmo. Nagriroka
Ta binay-akon nga intayab ti abagat
Ket naitanemen iti tukot daytoy lubong.
Nalabit ipagarupmo a mangmangngegko pay
Dayta timekmo nga agarup alun-onen payen
Dagiti dalluyon a nangipaanudam
Kadagiti inkurkur-itko a pammadayaw
Iti kinasam-it ken kinailailo dagiti balikasmo.
Saan! Bassit-usitdan nga arasaas,
Nga arimpadek kadagiti kaltaang ti rabii.
Makitkitak kadi pay ti rupam kadagiti ulep
Ta kas kapartakdan nga agawaaw ti lagipmo?
Wen, kas iti panagawaaw ti pait ti nabaawan a kape,
Ti nakillabban a kinilnat a balang a paria.
Kaing-ingasmo kadi pay, aya, dagiti nalalapsat
A bida a babbai kadagiti buyaek a romantiko
A pelikula? Addaka kadi pay, aya, kadagiti linabag
Dagiti linia dagiti nasasam-it, agun-unnoy a musika?
Nagriroka no baliksek pay ti naganmo tunggal agrukbabak
Iti kinaisangsangayan dagiti amin a bambanag a naimbag
Uray pay ngata agplastarka a higante a lamina
Iti tawa a nangtantannawagak kenka, dikan makita
Nagriroka no ipagarupmo a kadagiti panagmaymaysak
Kadagiti nasipnget a dalan, nalamiis a parbangon,
Kadagiti awanan pagturongan a biahe, kawaw a kanito,
Sapsapulenka, a sapsapulenka…
Hulio 26, 2011
Comments
Post a Comment