Kalpasan ti Bagyo

adda dagiti mabati
a mangar-arnas kadagiti gabat
a mabalin a pagsungrod
ket mapartuat ti temtem
a paginuduan
dagiti sabsabali pay a nabati
a lamlam-eken ken nagtalinaed
a maal-aliaw iti dimteng nga allawig;
mapabiag dagiti pimmusay a dalikan
ket mailuto dagiti mabalin
a maar-arnas
kas iti ubog ti natuang a niog,
wenno dalag a di nakasubli iti alog;
maaramid dagiti bangko
a pagtugawan dagiti di pay
mayat a mangukas iti tapayana
tapno nanamnam-ay a mangtugtugpa
no apay a dumteng ti didigra
iti lubong a ti mabukelna a sungbat
nabayagen a napanunot dagiti immun-unan
a sinangbayan ti parikut ken nalabit
narurungsot pay a pannakaburibor
ngem iti ipaay ti Nakaparsuaan.

adda dagiti napigpigsa a nabiag
a mangbagkat kadagiti bangkay
ket kasla nambaan wenno gabat laeng
a pagaabayenda ket imbes a maldaangda
iti nakapimpiman a nakapay-an
matdada kadagiti nalamiis
a basar kadagiti nalamiis
a rabii nga umap-apal
iti maysa a natalinaay a panaginana
ngem iti mangsungsungka
iti baro nga agsapa
a rugianda ti mangtukit iti sabali manen
a mula a mabalin a dalapusen manen
ti sabali ken nalabit napigpigsa a bagyo.

Hulio 14, 2011

"Peace After the Storm" ni Kelly Varner.