INTRAMUROS : KALTAANG

iti kaltaang ti rabii
nga impagarupko a yawat ti bulan
ti nalamiis a dakulapna
tapno mapaneknekan nga adda nabara
nga anges nga ik-ikutak
nagtakderak iti sango ti pader
idi pagam-ammuan
ta manipud iti diak ammo
a direksion, pettat a nagparang
ti nangisit a kulibangbang
a nagbangabanga iti kuppokuppok
ket nalabit impaypayakpakna
ti balligina
ta nakaduktal iti parsua
a nakawkawaw ngem isuna—
isu a tumatayab nga uray iti parbangon
nagdaldaliasat tapno laeng mapaneknekanna
nga adda nakapimpiman iti langalang
iti dayta a kanito
ket umanayen dayta nga anag
ti kaaddana iti lubong
(ta di kadi ti kulibangbang
ket naikari iti maysa a hardin
a namaris ti aglawlaw gapu
kadagiti nalalawag a siray
ti init?)
isu a pettat met laeng a nagpukaw
wenno nagturong nalabit iti disso
a diak impagarup a papananna
ket napalusposan ti imatangko

dina ammo, maysaak a managpartuat
ket ti impagarupna a nangisit a pader
a sangsanguek
maysa a sarming
a pangmatmatmatak iti pakabuklak
ken iti kinaadayok iti lubong
a sangsanguek
nupay awan sabali a pagpiliak
no di ti itatallikudko
tapno agtultuloy ti panagdaliasatko
nga adayo iti ania man
a gundaway
nga agbangabanga met iti kuppokuppok
dagiti sabali pay a kas kenkuana
nga agsapsapul
iti napimpiman ngem isuda
ket ad-adda a daksanggasatak
no isunto man met laengen
iti isu met laeng a disso
ken kanito
uray kalpasan ti riniwriw
a panagkatangkatang

tapno agurayak iti sabali manen
a gundaway
a tungpalen ti bulan
ti namnamaek kenkuana

Hulio 6, 2011
1:48 am