Posts

Showing posts from April, 2014

TIPS iti Panagilibro Para Kadagiti Mannurat nga Ilokano

NO maysaka a mannurat nga Ilokano ket kayatmo a NAPARTAK a mailibro ti gapuanam, dagitoy ti aramidem: 1. Masapul a nalaingka a mannurat. Ken no kabaelam, nalaingka nga editor. No dimo kabaelan nga editen ti bukodmo a sinurat— ta masapul latta met ti mangkita kadagiti malibtawam— manggayyemka iti nalaing nga editor. Ikkam met bassiten ti igatangna iti karut-omenna a kornik. 2. Masapul a nalaingka iti book design ken book layout. No dimo kabaelan dagitoy, manggayyemka iti makabael. Ikkamto met bassiten iti sukat ti inggatangna iti bolpen ken bond paper-na a nagpraktisanna a nangidesinuan iti librom ken iti sukat ti panagbayadna iti koriente bayat ti panangi-layout-na iti librom. 3. Masapul a napuskol ti rupam a mangilako iti librom. 4. Masapul nga adda ISBN-na ti librom para iti legal nga entidadna. Iti ababa a pannao, masapulo ti publishers. Ti nalaka a kasarsarita para iti daytoy ket GUMIL Filipinas ken Saniata Publications (a kukua daytoy numo). 5. Masapul a mangisaganaka it

Asino Dagiti Sumukat Kadakuada?

KAAW-AWATMI laeng ti text manipud kada Appo Eliseo B. Contillo, Dionisio S. Bulong ken Arthur P. Urata, Sr., a pimmusayen ni Apo Guillermo C. Concepcion gapu iti atake iti puso idi rabii (Abril 7). Iti patangan dagiti mannurat, particular dagiti kameng ti GUMIL Filipinas, nagkamengen iti GUMIL Langit. Itay napan a lawas (Marso 26), pimmusay metten ni Apo Crisostomo M. Ilustre gapu iti sakit a kanser. Ala, yat-atiddogtayo bassit ti agirekord. Idi napan nga Abril 2013, pimmusay met ni Apo Reynaldo A. Duque. Wenno, nagkamengen iti GUMIL Langit. Gagangay iti agpasina, makariknatayo iti leddaang. Ngem kas iti sangkakunada, kasta la ti biag. Adda umun-una, adda sumarsaruno. Iti biangmi, medio ad-adda a nakadadanag. Gapu iti dakkel a giwang a pinanawan dagitoy tallo a malalaki a mannurat. Umuna, ni Apo Guillermo C. Concepcion, iti lagipmi ken naimatmatanganmi ti kaudian a dumadaniw nga Ilokano. Ti kayatmi a sawen iti dumadaniw, isu ti panagdaniwna iti entablado nga awan ti kopiana. M

kawaw

agur-urnongak iti dapo dagiti napuoran a sabsabong ket innakto idengngep iti an-annayen ti bukel a gistayan magsatanen iti buot nga agnunnunog iti barukong an-anninawak ti rimat a nayasping kadagiti bituen ta mapukpukaw ti bulan idi dinawatko kenkuana nga isublina koma ti maris dagiti naglumen a ladawan padpadasek a pagsasaipen dagiti balikas no kasano a ti angin a mangrabrabak nabaelanna nga indatag kas pika ti impagarupko a sampaga a mangsappuyot iti dayta puso— ngem napirpirsayen dagiti libro birbirokek no sadino ti nagpaingam a suli ti lagip ngem iti sipnget, ti maarinsawadko ket saem idinto a ti lawag, awan ti sabali a makitak no di puraw a mangyan-anninaw iti kinakawaw ast. april 3, 2014.

Ania ti Mapaspasamak iti Sarita ken Kadagiti Mannurat nga Ilokano?

NAKADIDILLAW a kadagiti kallabes a bilang ti Bannawag (masursurat daytoy nga ababa a blogpost ita Abril 3, 2014), adu dagiti maipabpablaak manen a sarita karaman ditoy dagiti sarita da Appo Juan S.P. Hidalgo, Jr., Dionisio S Bulong, Pelagio Alcantara, ken dadduma pay. Aglaok a ragsak ken ladingit ti marikriknak. Ragsak gapu ta mabasak met laengen ken mabasak manen dagiti klasiko a sarita nga Ilokano. Ladingit gapu ta maysa daytoy a pagilasinan a masagsaginnit dagiti sarita a makapatar iti pagrukodan da Apo Literary Editor ken Apo Bannawag Editor. Nagrigat nga ipaskil ti kakastoy a bambanag ta amangan no adu ti madungiaran ti riknana. Ngem pakawanendak ta masapul a sarangtentayo a mannurat dagiti kakastoy a karit ti literaturatayo. Ti makunak iti daytoy, umuna, nasayaat koma no libro wenno journal a mabasatayo laengen dagiti klasiko a sarita. Ngem awan ti maaramidan dagiti appo nga editor ta kas kunada (segun iti lagipko): Nasaysayaat laengen nga ag-reprint-tayo ngem iti man