Agsaotayo iti Ilokano, kuna ni Dr. Almoite ti DMMMSU
Indarirag ni Dr. Orlando Almoite, chancellor ti Don Mariano Marcos Memorial State University (DMMMSU) North La Union Campus iti Brgy. Sapilang, Bacnotan, ti panagdadanggaytayo nga Ilokano a mangipateg iti nariingantayo a pagsasao. “Ikagumaantayo ti ag-Ilokano iti ania man a mayannatup a gundaway tapno agtalinaed ti kinasingedtayo nga aglalangen, kas maysa a madaydayaw a puli,” imbunannagna iti sango dagiti opisial ti GUMIL La Union (GLU) a nagtataripnong idi Agosto 1 iti board room ti DMMMSU. Ni Dr. Almoite ti napusgan a nangted iti mensahe, kas pannakabagi ni Dr. Ernesto Gapasin, presidente ti DMMMSU, iti pakpakauna a paset ti miting. Kinuna daytoy mararaem nga Ilokanista nga inkakaubinganna nga impapuso nga inadal ti lengguahetayo babaen ti panagbasbasana iti BANNAWAG agingga ita. Ket ngarud bigbigenna a babaen dayta, di agressat ti pannakaasa ti kabaelanna nga agsao iti Ilokano/Iluko ken ad-adda met a makarkarit a mangipateg ken mangidaduma iti nakayanakantayo a pagsasao. Linagipna...