Masaker Tallo Aldaw Sakbay ti Agtapos ti Bulan
NAKABARDAY kadagiti diario ti agdama a panunot ken aw-awid dagiti umili (kuna dagiti dadduma, dagiti agiwarwarnak met laeng): ama a nangsikog iti putotna; ina a nangsamal kadagiti annakna... Idinto a dagiti agparpartuat iti samiweng, agtitiponda kadagiti sirok dagiti agrakrakaya a pasdek a masansan a pagdudukotan dagiti polis tapno maiparammag nga adda ar-aramidenda malaksid iti makilumba iti agdadagsen— iti ababa a pannao, ti mangsaklot kadagiti boksitda. Di makapagkitakit dagitoy nga agparpartuat ta aruatenda pay laeng, pammanekneken a dida maibilang itoy a gimong nga iturturong dagiti agpampanunot a polis. Dagiti pintor, iti sabali a bangir, ibistida kadagiti diding dagiti imahinasionda ngem iti aramiden a mantel dagiti politiko wenno negosiante nga agparparikut a makaduktal iti kapartakan a paggastosan. Magmagnakami a saankami nga agdidinnungpar kadagiti pasilio, lansangan ken eskinita ngem agsasallupang dagiti kayatmi a papanan ken aramiden. Aggigiddan ti idadateng dagiti a...