Kultura: Pakatipunan ti pagsiriban ken kinasiasinno ti gunglo -- Zafaralla
Ni MA. ROSE A. CABIE GMM PRO/ GF Director QUEZON CITY -- Impaganetget ni Dr. Paul Blanco Zafaralla, maysa kadagiti manmano a mabigbig nga art critic ti pagilian, ti kinapateg ti kultura a mangiladawan iti kinasiasino ti ania man a gunglo a pakaisupadianna kadagiti sabali. Dayta ti bugas ti dandani maysa nga oras a lektiurna iti nailian a kombension ti GUMIL Filipinas, ti gunglo dagiti mannurat nga Ilokano iti Filipinas ken ballasiw taaw, a naangay iti Our Lady of the Angels Franciscan Seminary iti Novaliches ditoy a siudad. Ti tema ti dua nga aldaw a kombension dagiti mannurat, ti maika-41 a tinawen a panagtataripnongda nanipud nanipud idi 1968, a nagpatingga idi Domingo Kinnit (Easter), isu ti: "Pluma: mangtagiben kannawidan, mangsaluad nakaparsuaan." Iti lektiur ni Zafaralla, retirado a Professor 10 iti University of the Philippines 'iti Los Banos, kinunana a ti kultura ket maysa a balikas ken pakabuklan naruay a garit babaen ti tao, lugar, panawen, ar-aramid ken di ar-...