Ambong
ITI nagsanggiranna nga adigi ti pasdek a nanglinong iti bangketa, nasiputan ni Ambong ti panangibarag ti kataebna nga ubing ti apaggudua a donut. Nalabit panggep ti ubing nga isiut iti derosas a plastik a dram a namarkaan iti puraw nga MMDA ngem naitira daytoy iti bakrang ti pagbasuraan. Nagkallatik iti iking ti bangketa nga agar-arimasa iti nangisit ken nalanit a naglaok a danum, grasa, tupra, isbo. Sinayagna. Sangaagpa laengen ti kaadayona iti donut idi magaw-is daytoy. Ni Tura! Dagus nga indiretso ni Tura ti donut kadagiti napuskol ken nalitem a bibig daytoy. Nalitem met laeng ti kulot a buok, kudil, kamiseta ken siorpantna gapu iti naglalaok nga asuk, tapok, grasa ken no ania ditan a narugit a banag nga ipugpug-aw ti siudad. Nagatras ni Ambong idi maisarang ti kanawan a gemgem ni Tura. Nabakbaked daytoy kulot a barito ken nataytaya iti agarup dua a pulgada. Nagmusiig ni Ambong a nangkudkod iti teltelna. Nariknana ti pannakalukot ti babassit a banag. Kinammetna ti teltelna sa impuna...