ARIEL SOTELO TABÁG

Iti panangrambak ti Cagayan iti Nailian a Bulan ti Arte “Dumidinallot, Dumidinallang!” Da AILEEN R. RAMBAUD ken LUDILYN ELY F. BRAVO MARAMRAMBAKAN ti Pebrero a kas Nailian a Bulan ti Arte a kas ituyang ti Proklamasion Presidensial 683 a naipaulog idi 1991. Naisentro ti selebrasion iti pannakaitandudo ti kultura ken arte ti pagilian tapno mapabileg ken maisaknap ti kinamanagparnuay ken imahinasion ni Filipino iti naintimpuyogan a wagas. Pinarungbo ti National Commission for Culture and the Arts daytoy a selebrasion idi 2009 ket naaw-awagan iti Philippine International Arts Festival. Nabirngasan daytoy a piesta iti “Ani ng Sining” a nagbalin a pammaneknek iti napaglilinnaga a saguday ti arte ken kultura a nangted pay iti naidumduma a panangsaripatpat ti pannakayebkasna. Kas paset ti napasnek a pannakaparang-ay ti arte ken kultura iti probinsia, tinawen a rambakan ti Cagayan babaen ti Cagayan Museum and Historical daytoy a pasken. Mamati ti probinsia a babaen dagiti kakastoy a gannuat, ma...

Maysa a pabuya kultural nga imparang ti gobierno probinsial ti Cagayan babaen ti Cagayan Museum and Historical Research iti Tuguegarao City a pangrambak iti Pebrero a kas Nailian a Bulan ti Arte ti nangtignay iti rikna dagiti nagbuya tapno itandudoda ti arte ken kultura iti Tanap ti Cagayan. Napauluan iti “Anasaas iti Karayan (Ripples in the River)”, naiparang iti pabuya ti sangauyon a daniw, dallot, samiweng ken sala a tagipatgen dagiti Ilokano. Buklen dagiti nagpabuya dagiti mannaniw, kumakanta, mannala, ken concert artist manipud iti Kailokuan ken Tanap ti Cagayan. Kaaduan kadagiti naggapu iti ruar ti Cagayan ti kameng ti GUMIL Filipinas, gunglo dagiti mannurat nga Ilokano iti pagilian ken ballasiw-taaw nga indauluan ti presidentena a ni Elizabeth M. Raquel, ken ti Daniw ken Basi, maysa a tignay a mangitandudo iti Ilocano performing art a buklen ti Tres Tarappait, Samtoy Band ken dadduma pay a mannurat. Dinar-ayan dagiti nailian ken lokal nga opisial iti gobierno, ken dagiti tumultu...