Sibubukel a kurikulum, panggep a baliwan ti DepEd
Panggep ti Department of Education (DepEd) a repasuen, ket no kasapulan, baliwanna ti sibubukel a kurikulum. Iti pannakiumanna kadagiti agirakrakurak itay lawasna, kinuna ni Education Secretary Armin Luistro a panggep ti addang nga ituding dagiti maitutop a maisuro tapno magun-od ti nangatngato pay a kalidad ti edukasion para kadagiti agad-adal iti Filipinas. “Ammuentayo no ania dagiti rebbengna nga isuro kadagiti ubbing a mangtubay kadakuada tapno inton makaturposdan, maipagpannakkelda ti kabaelanda,” kinuna ni Luistro. Innayon daytoy a maikkat iti kurikulum dagiti dina rebbeng a maisuro. Kinunana nga iti agdama, napno iti nadumaduma a leksion ti kurikulum isu a marigatan dagiti ubbing nga agadal. Kinuna pay ni Luistro a marugian ti panagrepaso apaman a mabukel ti team-na wenno no nadutokanen dagiti undersecretary ken assistant secretary ti DepEd. Namnamaenna a malpas ti panagrepaso iti uneg ti dua a tawen. Dinakamat pay ti sekretario a maigiddan iti pannakarepaso ti kurikulum ti isyu...