ARIEL SOTELO TABÁG

Iti panagsublik, natakuatak a naipadagan Dagiti armas ken prinsipio. Napagpapatasen Dagiti taltalon, barikir ken turod. Saanen A natina iti dara dagiti ubbog ngem ti arapaap Dagiti karayan, mailaklakon kadagiti turista Kadagiti kalapaw kadagiti sirok ti rangtay. Naimulan dagiti kanalbuong ket kasla uong A nagtubon dagiti kapilia. Dagiti agtutubo, Nagigpildan kadagiti biblia: agsasallupang Dagiti alleluia— dagiti agduduma a nagan ti dios, Saan ketdi a bala, dagiti maisirsirig Iti tunggal maysa ket pakaitan-okan ti mapuntaan. Nasurotanen dagiti desdes nga agturong Kadagiti pagadalan. Natakuatandan a saan A naaladan ti lubong ket adda dagiti nalawa A tanap a pagdaliasatan— pakateggedan Iti naisangsangayan a nagan ken gatad A mangipasdek iti batonlagip ti kinaalibtak. Saanen a gumilgil-ayab ti bannawag Ta inadawen dagiti bombilia ti rimatna. Addan kadagiti estereo dagiti tumatayab— Iti telebision dagiti alutiit ken kawitan Ket ti kanito: marukod, makunikon, mabennat, Maisaluket, magatang, ...

(Wenno ti Kalsada a Nangusat iti Awaymi) Nupay adayo nga at-atiddog Ngem iti agsisipol a bitukami, Kas iti lapis iti papel Ti tammudo iti awaymi. Kaykayat dagiti agtutubo Ti agurnos iti bato, graba ken semento Ngem ti agmula iti kapitakan— Kunada a kongkreto ti panagdur-as Ket agat-daga ti kinakurapay; Uray bingkol no tumangken, Tapok met laeng a masayyasayya. Karemkemenda dagiti sensilio— Mabsogda, ket ti panagtig-abda iti pirak Pammati a naparpartak a rumtab Dagiti angalo a pasdek Ngem dagiti uong nga agbaribari pay Kadagiti ansisit. Dangdanganen laengen ti lugan Ti nagbaetan ti agtutubo ken nagannak Kas iti panangkawikawna iti minilmilia A talon, turod, karayan, bakir ken tangatang Iti nagbaetan ti bullalayaw iti laud Ken ti taaw iti daya— iti daya a lumung-aw dagiti siokoy a nagbaklay iti motorsiklo, telebision, kotse, casino, beach resort, ket iti apagkirem agbalinda a balitok iti sakaanan ti bullalayaw; Nakaparpartak ti trak Ngem ikagumaan ti agtutubo ti kumamat Ket m...