ARIEL SOTELO TABÁG

AKUEK nga idi damok ti makisalip iti Palanca Memorial Awards for Literature wenno am-ammo ti dadduma a Palanca, awan ti agay-ay-ayam iti panunotko no ania ti maangay iti awarding. Basta kayatko laeng idi ti mayabay iti nagan dagiti id-idoluek a mannurat. Ngem kalpasan a napadasak ti dimmar-ay iti awarding idi 2003 gapu iti panagsegundak ken ni Apo Reynaldo A. Duque— iti dayta a tawen nga inyalatna ti Hall of Fame— inkarik iti bagik a mangabakakto manen. Agasem ta agarup makitam amin sadiay dagiti agkakalaing kada agkakalatak a mannurat a Filipino. Ken agarup maramanam amin sadiay dagiti agkakaimas a potahe. Ken agarup adda amin sadiay a kita ti mainum— soft drinks ken nasanger. Ti adatna, nagsasaruno nga awan ti nagam-udak kadagiti simmarsaruno a tawen— 2004 agingga iti 2007. Kasla met la inlunoddakon dagiti arak ken luto nga ar-araaran ken tinawen a pagpappapasan da Miks ken Manong Johnny. (Diak latta ibagbaga ti apeliedo ken pudno a nagandan tapno maprotektaran ti dayawda. Pagsidsid...

ITI kaudian a panagbakasionko idiay Sta. Teresita, kasla immubingak iti sangapulo ket walo a tawen ta kasla nagsubliak iti daydi tawen nga adda napasamak ken ni Angkel Ato. Iti panagsapsapulmi ken nanang kadagiti sertipikok iti Best in Math iti elementaria ken haiskul tapno idatagko iti prinsipal iti eskuela publiko iti Cubao a pangisuruak a nayon dagiti pammaneknek iti kabaelak ket nadardaras ti ingangato ti ranggok a pakairamanan metten ti sueldok, adda nabirokanmi a sabali a banag. Kinuna ni nanang nga impanna dagiti sertipiko iti nagdaplat a bag a namarkaan iti “L.A.”, ti brand ti sigarilio ni tatang idi chain smoker pay laeng. Napno ngaminen ti diding ti bassit a balaymi kadagiti sertipiko kadagiti inabakko a pammadayaw iti salip iti panagsurat. Daytoy a bag, a maysa kadagiti nangisukatan ni nanang kadagiti ginasgasut a nagawangan ni tatang iti sigariliona, ti sinukimatmi. Ngem awan met dagiti sertipiko. Gayam, nalukotlukot a naikarga iti maysa kadagiti uppat a bulo a tubong a nan...

Manipud itoy Oktubre 18, 2010 a bilang ti Bannawag, marugianen a maipablaak dagiti sarita iti Iluko a nangabak iti salip iti sarita iti Palanca 2010. Luktan daytoy ti "Apo Bannual! Apo Bannual" ni Joel B. Manuel iti Banna, Ilocos Norte a nangabak iti Maikatlo a Gunggona. Sumaruno ti "Voice Tape" ni Ariel S.Tabag iti Sta. Teresita, Cagayan a nangabak iti Maikadua a Gunggona. Ken ti "Dagiti Arapaap ni Angelo" a sarita ni Sherma E. Benosa iti Bambang, Nueva Vizcaya a nangabak iti Umuna Gunggona. Padaananyo!

NANGABAKDA ITI 2010 PALANCA. Inyalat ni Sherma E. Benosa (tengnga) ti National Commission for Culture and the Arts ti Umuna a Gunggona iti Salip iti Sarita iti Iluko ti 2010 Carlos Palanca Memorial Awards for Literature babaen ti saritana a “Dagiti Pasugnod ni Angelo”. Kadua ni Benosa, tubo iti Bambang, Nueva Vizcaya, a nangabak da Ariel S. Tabag (kakanigidan), Poetry Editor ti Bannawag; ken Joel B. Manuel (kakanawanan), Prinsipal ti Banna National High School, Banna, I.N. Pinangabak ni A.S. Tabag, tubo iti Sta. Teresita, Cagayan, iti Maika-2 a Gunggona ti saritana a “Voice Tape”; ti met “Apo Bannual! Apo Bannual!” ti pinangyalat ni J.B. Manuel, tubo iti Banna, I.N., iti Maika-3 a Gunggona. Napadayawan dagitoy a mannurat bayat ti pannakarambak ti Maika-60 a Tawen ti Palanca Awards a naangay iti The Peninsula Manila, Siudad ti Makati idi Set. 1. (Rinetrato ni Manuel Benosa)