Panagmula iti “Ilocano Heritage Tree”, nayalnag
Kas pannakipaset ti Bannawag iti pannakaitandudo ti pannakaparang-ay ti aglawlaw ken pannakatagiben ti kultural a tawid dagiti Ilokano, inyalnag ti magasin itay nabiit ti panagmula ti “Kayo ti Tawid ni Ilokano” wenno “Ilocano Heritage Tree” kadagiti historikal a lugar, arubayan ti pagadalan ken public parks. Kangrunaan a panggep ti pannakaimula dagiti heritage trees ti pannakaitan-ok dagiti naisangsangayan a saguday ni Ilokano a mangmangted iti kaipapanan iti nangayed a panagbiagna: ti kinagagetna, ti kinasalimetmetna, ti kinaandurna, ken ti aglaplapusanan nga ayat ken kabaelanna a mangsaranget kadagiti karit iti biag tapno matubay ti kinatalged ken panagrang-ay ti kaamaanna ken ti lugar a pagnanaedanna. Mamati ti Bannawag a naindaklan dagitoy a kababalin ni Ilokano a nangitunda kenkuana tapno raemen ken paregtaenna dagiti kadaraanna ken dagiti sabsabali pay a puli iti nagduduma a paset ti lubong a nagdaldaliasatanna. Maimula dagiti palakay babaen ti tulong dagiti pagadalan ken dadduma...