ARIEL SOTELO TABÁG

Rugian dagiti agkabannuag a mannurat nga Ilokano ti agpabuya iti babaen ti proyektoda a “ Daniw ken Basi” itoy Nobiembre 9 (sumaruno inton Disiembre 14) manipud iti alas 7 agingga iti alas 9 iti rabii iti Conspiracy Garden Café iti Visayas Avenue, Quezon City. Panggep ti nasao a proyekto nga itandudo ti Literatura Ilokana nangruna iti daniw ken ti pannakaibasa daytoy malaksid pay a maiparang dagiti nadumaduma a porma ti daniw Iluko a kas iti dallot, pangorona a daniw, bukanegan, duata, danirak, daniw para ubbing, daniw iti parparaangan ken dadduma pay. Kadagiti dadduma pay a mannaniw iti Iluko nga interesado a mangsuporta iti gannuat babaen ti panagibasada met iti daniw iti babaen ti nasao a gannuat, agsurat iti ariel.tabag@gmail.com. (Mighty C. Rasing)

Ni Maria Rosa A. Cabie ITI umuna ken naisangsangayan a gundaway, nagtitipon dagiti mannurat nga Ilokano iti Mag:Net Cafe iti Katipunan Road iti daytoy a siudad iti nasurok a tallo nga oras a naawagan "Go GUMIL Night." Ditoy nga imparangarang dagiti mannurat nga agsidsida't saluyot, pinakbet ken bagnet nga agnanaed itan iti kabisera nasional dagiti naintalugadingan a kannawidanda. Mairaman ditoy ti dallot, kas harana a mapukpukawen kadagiti aw-away ti Ilokandia, maysa a sukog ti daniw dagiti i-amianan a masansan aramaten dagiti umuli -- mamanhikan, kuna dagiti Tagalog -- nga agar-arem tapno inna dawaten ti ima ti inna ipatpateg. Dadduma, daydiay ama ti nobio ti agdallot, nga agarup pay inna isarukigkig ti panangidallotna iti rantada kadayta nga aldaw. Masansan a mairugi daytoy a sukog iti "ay dumidinallot, dumidinallang..." ket dayta met laeng ti inna paggibusan. Naitungpal daytoy kas paset ti linawas a panagtitipon dagiti mannurat kadagiti sabasabali a rehion, i...