Kaso ti dengue, timmayok iti 40%
Immadu iti 40 porsiento dagiti kaso ti dengue iti pagilian iti umuna nga innem a bulan daytoy a tawen. Segun iti datos ti Department of Health (DoH), rumrummuar nga umabot iti 25,283 dagiti kaso ti dengue a nairekordda manipud iti Enero 1 agingga iti Hunio 26. Nangatngato, segun iti nasao nga ahensia, iti 40 porsiento no maidilig iti agpada a tiempo itay napan a tawen. Kuna ni Health Secretary Enrique Ona, maysa kadagiti posible a makagapu iti yaadu ti kaso ti dengue ti climate change wenno panagbaliw ti paniempo. Innayonna a mabalin met a ngimmato ti pannakaammo ti publiko mainaig iti dengue isu nga immadu ti agpatpatsek-ap no makariknada iti pagilasinan ti nasao a sakit. Iti dagupna, umabot iti 190 ti nairekord a natay gapu iti nasao a sakit. Mainaig itoy, pinalagipan manen ti DoH ti publiko nga agan-annad tapno saan a kapten ti nasao a sakit a ipaay ti kagat ti lamok.