Libro ti dandaniw ni Tabag, mayalnag
Mayalnag ti libro ti dandaniw ni Ariel Sotelo Tabag, poetry editor ti Bannawag, a napauluan iti Panangarakup iti Ipus ti Layap ken Dadduma Pay a Daniw inton Enero 24, 2016. Impablaak ti Saniata Publications, nairaman iti nasao a koleksion dagiti sumagmamano a premiado a daniw ni Tabag, ken sumagmamano kadagitoy ti naipablaaken iti Bannawag , ken dagiti bersion iti Ilokano dagiti daniw a Filipino (Tagalog) a naipablaak iti Liwayway ken Ani , ti journal ti Cultural Center of the Philippines. Maangay ti panagyalnag bayat ti “Innuman ken Inninuman,” serye ti interbiu kadagiti mannurat nga iwayat ti GUMIL Metro Manila, gunglo dagiti mannurat nga Ilokano iti Katagalogan, iti Kaunlaran Village, Caloocan City a sangailien da nag-direktor ti GF Leonardo S. Fagaragan ken Dr. Zita Nepomuceno-Fagaragan. Kadagiti interesado a maaddaan iti kopia ti nasao a libro, kontaken ti FromMe2U Bookshop, maysa nga online bookstore nga imatonan ni Roy V. Aragon iti numero a 0927 794 2327.