ARIEL SOTELO TABÁG

No bilang naranggas kenka ti kinaagmaymaysa ta uray isu siuulimek a tallikudannaka, awagannak iti kaltaang, dumtengak a kas angin siuulimek di mangngeg di maimatangan agparikna laeng kenka. Pebrero 7, 2012

Pebrero Katorse No adda koma maisagut kaniak a bileg Uray maysa laeng: piliek petsat’ ipupusay Pebrero katorse nga aldaw ti patempateg Ta amin agay-ayat, awanan tarumpingay Tapno kuak amin a limdo, amin a ladingit Kuak ti ranggas ti kimat, ti ulpit ti aluyo Tagiimnasek a sakduen pannusa ti langit Tagiyamanek nga isaplisaplit ti bagyo Piman a maidasayak sakbibit’ didigra Nalamiis laengen a lagip ti mangatag. Aniat’ serbin nadarisay nga ubbog ti rikna Ken ‘toy nalabaga a rosas iti dakulap? Agtiponda’t barukong kas maysa a bukel Nangisit a rosas agsantak rabaw ‘toy tanem. Agosto 30, 2011

ket kasla lati. iti kanito a nakalupkopanna ti bagi, in-inut-- iti nadagem ken naintarumpingayan a wagas-- tagikuaenna ket agbalin a paset ti kinalatina amin a piskel, dara, puso, utek, bitek, lagip, kararua... hulio 20, 2011

Solitario Sarita ni ARIEL S. TABAG BIMMANGON ni Ace. Agwengwengweng dagiti lapayagna. Kasla mangmangngegna pay laeng ti ariangga dagiti gitara ken tambor ti Shotgun Blues a bandana a nagtokar iti 70’s Bistro iti Project 2, Quezon City ken dagiti palakpak ken paswit dagiti nagbuya. Minatmatanna ti dekutson a kama a nagiddaan ni Lucille a baketna ken dagiti annakda a da Awit nga agtawen iti lima ken Mutya nga agtawen iti uppat. Dinan sininga ida itay parbangon nga isasangpetna. Nagyaplag lattan iti bed sheet iti sakaanan ti kama. Ita, awandan. Ken uray siguro ti katuganganna a babai, ken ti katulonganda. Winagwagna ti ulona ket kunam la no mapung-il ti tengngedna iti kinadagsenna. Maulaw a saan. Inamuyna ti panguloten a buokna. Nakitana iti desarming nga alarm clock— a dina nangngeg ti panagkiriringna— a liningdan manen ti panguloten a buokna ti lapayagna, ken rumaberen a barbas ken imingna ket umarngi manen ti langana iti paboritona a kumakanta a ni Kurt Cobain ti Nirvana. A...

apay a nagsarakta ket nakitak iti isemmo dagiti amin a naiimbag a bambanag ditoy lubong, nangngegak iti timekmo dagiti mataginayon a samiweng, namatmatak iti alintatao dagiti matam ti linglingay a tinagtagainepko iti naunday a tiempo? bitogennak dagitoy a saludsod ta kayarigak ti mangkaskastigo wenno agduadua iti Bileg ti Mannakabalin a nangkibin ken mangkibkibin iti tunggal maysa tapno agtugmok iti naisangrat a gundaway ken tiempo ket kalpasan nga agballatek ti panagduaduak kadagiti amin a bambanag iti aglawlawko, agtungpal dagiti amin a panagduadua, pammabalaw, panagkastigo iti bukodko a pannakaitao ken kinatao ta nalabit agbibiag ken mamatpatiak iti pinarpartuatko laeng a realidad ken gasat ta apay nga awanka iti disso a ninamnamak nga ayanmo? Hulio 7, 2011 4:07 PM binulodko ti ladawan

(kamaudiananna, adtoyen 'toy kanta a pangrikep itoy a proyekto. linglingay-- naragsak, mangtignay.) Linglingay Intro: G-C (4x) G-C Linglingay, linglingay Em D Sikat’ rimat layap Em D Mutiat’ sabunganay Em C D Tagiurayenka tunggal parbangon Chorus: G-C Linglingay Sikat’ ragsakko O Linglingay Yeah Linglingay Sikat’ bagnosko O Linglingay Filler: G-C (4x) Em D Sampagat’ kalgaw Em D Mata ti littugaw Em C D Pasantakem, Biagko, ‘toy aglawlaw (Repeat Chorus) Adlib: G-C (8x) Coda: G-C Lalalalala lallay, Linglingay (10x) Linglingay (fade) Hunio 15, 2011 (nagbaliw ti paulona daytoy a proyekto gapu ta marigatanak nga agdaniw iti adu a dandaniw ni tarumpingay. kinapudnona, immunan a naaramidko ti samiweng a "linglingay" gapu ta nadagsen unayen iti barukong dagitoy nagsasaruno a dandaniwko a puro leddaang kada tarumpingay. ngem a...