Pimmalanca ti "Littugaw"
PARIKUTKO iti editorial ti mangisiki iti oras tapno regular a makasuratak iti sarita ken daniw, kas iti ar-aramidekon manipud idi inkeddengko ti agsurat iti Iluko. Taltallokam laeng ngamin iti Editorial ti Bannawag, basbassit nga adayo iti lima a sigud a bilang ti staffna idi adda pay ti opisinana iti Makati ken kukua pay laeng ti Liwayway. Saan a gapu ta makapagsuratak koma iti opisina. Iti kaadu ngamin ti obra, awanton ti mabati pay a panunot ken pigsa inton makasangpetak idiay balay ket amang a nasaysayaat a kaatag dagiti matmaturogen a putot ken kasimpungalan ngem iti mangikur-it iti nabambannog a balikas wenno linia, tapno laeng matungpal ti ragut wenno raas a makasurat. Agyamanak ken ni Apo Literary Editor Juan Al. Asuncion ta nangisagana iti maysa a bilang ti Bannawag para iti maysa a saritak. Rinugiak ti nagsurat iti sarita a para pablaak. Daytay sarita nga awan ti pampanunotek-- panangabakna, no magustuan dagiti hurado-- no di ti pannakasangal ti maysa a sarita a mabalin nga...