No Bilinen ti Taaw Dagiti Dalluyon
SILALAGIP dagiti tarukoy iti rangtay a daga ket isapsapatada ti panagkinnamang koma itan dagiti silaw ti lampitaw ken ti rinibu a rimat ti siudad. Nagtengdan ti nagpatinggaan dagiti rukib ket agarapaapda kadagiti abut a mangliwengliweng a mangitunda kadakuada iti panagpatingga ti yaabut ket sitatalinaaydan nga agkukot— sinanam-ay. Kastoy met laeng dagiti umili daytoy puro a mangnamnama iti parabur ti taaw. Dida impagarup nga impasngay dagiti dalluyon ti diosa ti taaw— nupay binulod dagiti matana ti balbag ti tangatang; idinto a ti buokna, ti ginget dagiti bakir: datdatlag ngarud ti pettat nga ilulutuad ti didiosen a nangyam-ammo iti bagina kas E iti aplaya ta iwaragawagna nga inyula dagiti elektroniko a bituen. Ngem ad-adda a nakadatdatlag ti mabalin a panagawaawen ti bileg dagiti didiosen wenno naisangsangayanen ti kabaelan dagiti gagangay a tao, ayup ken ikan. Ta agpapadan dagiti parsua malaksid kadagiti bisti ken batek. Paneknekan ni E ti bilegna babaen ti panangpaltuadna iti baybay...