5,000 a katao ti matmatay iti tinawen iti polusion iti angin
Mapattapatta a 5,000 a katao ti matmatay iti tinawen gapu iti sakit a maalada iti polusion iti angin. Iti maysa nga innuman iti Quezon City, imbatad dagiti mangibagi iti grupo a Clean Air Initiative for Asian Cities (CAI Asia) Center ti epekto ti agtultuloy a panangrugit dagiti tattao iti angin. Segun iti panagadal ti nasao a grupo, nalaka a kapten iti sakit iti bara kas iti asthma, bronchitis ken sakit iti puso gapu iti narugit nga angin, dagiti ubbing ken nataengan. Gapu itoy, nangidatag ti nasao a grupo iti surat ken ni Presidente Noynoy Aquino a mangisingasing nga ipangruna koma ti gobierno ti kampania kontra iti polusion iti angin.