ARIEL SOTELO TABÁG

Agaarang (Holdaper) 1. Propesional ADDA iti kawatiwatan ti Quirino Highway iti Pangarap nga agpa-Tungko ti bus idi pagam-ammuan ta adda nagpukkaw iti “Holdap ‘to!”. Nakigtotak ta ti lalaki iti ayanko a para iti tallo a tugaw a dumna iti sarming ti nagpukkaw. Narnekan ti pamaketenen a balkat iti nagtengngaanmi ken ti nagpukkaw ta iti itatakder daytoy, nagtulid ti ulo ti babai iti abagak. Pabasolek la ket ngarud daytoy iti inaramid ti lalaki ta apaglabesmi la itay iti Wildlife a nakaturog ti babai ket nagsadagen iti abaga ti lalaki— wenno agtutubo pay ketdi ta paninggiten pay laeng ti pukkawna. Nalagipko a daytay lalaki a winayaak iti Quiapo daytoy. Ken nalagipko a pamurnokenda. Ket idi tumaliawak, agpayso nga adda dua a lallaki a nakatakder met itan iti tengnga, sa adda iti likud. Sabali met ti lalaki a nagtakder iti kabinnatogmi a tugaw para iti dua nga isu ti nangkidmat iti drayber nga apagapaman a timmaliaw. “Mag-drive ka lang, Kuya,” kinuna daytoy a siaalumamay ngem sigur...

NAGKUY-OS ti riknana idi nagpanti ti babai bayat ti panangkunkunikon ti bagi daytoy a nangkumpas iti “Careless Whisper” idinto a nakapungpungay dagiti matana. Nagpalagapag sa nagpaswit dagiti agbuybuya. “Isuot a dagus ti bra!” Adda nangipukkaw. “Bra! Bra! Bra!” Riaw met ti sabali. “Isuot na! Isuot na!” Riaw ti sabali pay. “Suktanyo ngamin ti kanta! Tiempo pay ni Grandma Katrina!” Nagpapaggaak dagiti agbuya. Naipatangatang ti nasaranta a tugtog. Ad-addan ti riaw dagiti agbuybuya idi imbarawid ti babai iti barukongna ti bra a ginuyodna iti pagisalapayan iti likudanna a nakaisalapayan ti leggings, nighties, spaghetti, palda, bestida, gown… Ket bayat ti in-inut a panangisuotna dagiti nadakamat nga aruaten kas panagsasaganadda, pumigpigsa met ti palagapag, paswit ken riaw dagiti agbuya. Ad-adda la ngaruden idi nakasuoten iti gown ti babai. Awanen ti arindenggan. Ken nakatakder aminen a masanguanan dagiti agbuybuya. Uray isuna. Timmakder idi dinan madaeran ti riknana. Nagpalabes iti kasilia....