Kurso iti lluko, silulukaten iti DMMMSU
Mabalinen ti agenrol iti espesial a kurso nga Iloko Creative Writing nga idiaya ita a kalgaw ti Don Mariano Marcos Memorial State University-Open University System (DMMMSU-OUS) iti Siudad ti San Fernando, La Union. Impakaammo daytoy ni Dr. Remedios M. Corpuz, direktor ti DMMMSU-OUS, a nagkuna pay a silulukat daytoy a kurso para kadagiti agkalikagum a mangasa iti laingda nga agsao ken agsurat iti Iluko (Iloko, Ilokano), nangruna dagiti mannursuro kadagiti pagadalan iti elementaria. Inlawlawag ni Dr. Corpuz a maysa kadagiti leksion a maisuro ti maipapan iti gramatika Iluko. Malaksid itoy, maisuro pay no kasano ti agputar iti daniw ken sarita a para ubbing, agraman ti ababa a saribitniw (sarita, bitla, daniw a napagtitipon), maysa a porma ti literatura Iluko a makaparay-aw a buyaen no mayentablado. Maangay dagiti klase iti malem ti tallo nga agsasaruno a Sabado ti Abril 30, Mayo 7 ken 14. Ket amin nga agturpos, maikkandanto iti sertipiko a kapadpad met la ti diploma. Para iti dadduma pay ...