Posts

Showing posts from May, 2011

Mapapigsa, pannakaaramat ti bernakular ken Filipino kadagiti pagadalan

Sagudayen ti SB 821 Mapapigsa, pannakaaramat ti bernakular ken Filipino kadagiti pagadalan Ad-adalen ita ti Senado ti Senate Bill 821 nga indatag ni Sen. Jinggoy E. Estrada nga agpanggep a mangpapigsa iti akem dagiti dominante a rehional a lengguahe ken ti Filipino iti pannakaisuro dagiti agad-adal iti elementaria ken haiskul iti Filipinas. Sagudayen ti SB 821 nga am-ammo pay a kas “An Act Strengthening the Role of the Vernacular and Filipino in Functional Literacy and Providing Guidelines for Its Classroom Use”, mausar ti rehional a lengguahe a kas language of instruction wenno lengguahe a pangisuro kadagiti agad-adal manipud iti Umuna a Grado agingga iti Maikatlo a Grado iti elementaria idinto a maisuro ti Filipino a kas agmaymaysa nga asignatura agingga iti Maikapat a Tawen iti haiskul. Iti met Grado Tres, mayam-ammo met ti Ingles a kas agmaymaysa nga asignatura ken maisuro a kas asignatura agingga iti Maikapat a Tawen iti haiskul. Ken iti met Maikapat a Grado, maipaigiden

World-class ti Samiweng Singers

World-class ti Samiweng Singers WORLD-CLASS met ti talent-tayo nga Ilokano, Kabagis. Ania ti pammaneknek? Maysa daytoy Samiweng Singers manipud iti Ilocos Norte National High School (INNHS) a nangatiw kas over-all winner iti umuna a Vietnam International Choir Competition. Internasional, Kabagis. Nasurok a 30 a choir manipud iti 12 a pagilian ti inatiwda. Isuda ti over-all a kampeon ta nangabakda iti dua a kategoria— Children’s Music category, ken Sacred Music category. Ken saan laeng a padada nga estudiante ti inatiwda, Kabagis. Mabigbigbig met a choir dagitoy a pagkamengan dagiti nataengan. Di ketdin naglalaing dagitoy nga agtutubo nga Ilokano, Kabagis? * * * Mayannatup kadakuada ti naganda. Di kadi ti Samiweng ket manipud iti napagtipon a “nasam-it nga aweng”? Wen, pudno a nasam-it ti aweng ti timek dagitoy nga agtutubo, Kabagis. Ket bigbigenda a dakkel ti naitulong ni Apo Robert Caluya, a maestro iti musika ken arte iti nasao a pagadalan. Isu ti nang

Narambakan Dagiti Kannawidan ken Tawid iti Cordillera Region

Image
Babaen ti Tam-Awan International Arts Festival Narambakan Dagiti Kannawidan ken Tawid iti Cordillera Region NAIWAYAT iti Tam-Awan Village iti Baguio City ti Second Tam-Awan International Arts Festival (TIAF) itay Mayo 13-15 2011. Mayannurot daytoy iti pannakarambak ti Nailian a Bulan ti Tawid (National Heritage Month) itoy Mayo ken idauluan ti National Committee on Art Galleries ti NCCA ken ti Chanum Foundation, Inc. Nagrikudo daytoy maikadua a TIAF iti tema a “Weaving Through the Arts” kas mayannurot met laeng iti tema ti National Heritage Month itoy a tawen a “Taoid: Weaving our Stories, Threading our Paths.” Nailaga met iti kultura iti Cordillera Region ti panagabel wenno panaglaga. Kinapudnona, addaan dagiti innem a probinsia iti Cordillera iti kabukbukodan nga abel ken wagas ti panagabel, nga isu met ti maiparang ken marambakan iti TIAF. Malaksid iti dayta, panggep ti TIAF a gutigoten dagiti agtutubo nga agbalin a paset ti arte ken maluktan ti kananakemda kadagiti pito a

11.3-M a Filipino, awanan iti trabaho

Manipud iti 9.9 a milion idi Nobiembre itay napan a tawen, immaboten iti 11.3 a milion ti bilang dagiti Filipino nga awanan iti trabaho itoy a Marso, segun iti surbey ti Social Weather Stations (SWS). Kuna ti SWS a paneknekan ti surbey ti impakaammo met laeng ti gobierno sakbayna a panagtultuloy ti yaadu dagiti awan pagtrabahuanna a Filipino. Nadakamat a karaman itoy a bilang dagiti awanan trabaho daiti nataengan a no di man naglusulos, nairaman kadagiti nakerras nga empleado, ken dagiti damona ti agbirok iti trabaho. (Bannawag, Hunio 6, 2011)

Silulukaten! Salip iti Sarita ti 14th AMMAFLA

Silulukaten ti Salip iti Sarita ti Maika-14 nga AMMA Foundation Literary Awards. Imatonan daytoy da Alfredo ken Cherry Quibol, Francisco ken Aurora Ponce, ken da Amado ken Gloria Yoro, kas iti sigud, agpaay ti pasalip kadagiti agdadamo a mannurat iti Iluko a “kas pangaron iti reggetda a mangpatadem pay iti plumada.” Agdagup met iti P25,500.00 ti premio a pagbibingayan dagiti mangabak. Adtoy ti kompleto a pagannurotan: 1. Mangrugi ti salip iti Mayo 23, 2011 ket aggibus daytoy iti Enero 31, 2012. 2. Agpaay laeng ti salip kadagiti agdadamo a mannurat iti Iluko. Itoy a pasalip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Mayo 16, 2011 a bilang ti nasao a magasin. 3. Siwawayawaya ti autor a mangpili iti topiko ti isalipna a sarita. 4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Med

Panagminas iti Cagayan, nakontra

Agsaksaknap ita ti panangkontra dagiti mannalon ken mangngalap iti Gonzaga, Cagayan ken dagiti umili manipud iti pito a sabsabali nga ili ti probinsia iti panagminas iti magnetite iti ag-13,843 nga ektaria nga igid ti baybayda. Kinuna ni Salvador del Pueblo, pannakabagi ti National Democratic Front iti Cagayan Valley, a sipipinget itan a kontraenda ti panagminas ti Lian Xing Philippines Stone Carving Corp. iti Barangay Batangan iti disso a “pinadur-as ken tagtagibien dagiti mannalon ken mangngalap”. Kuna ni Del Pueblo a gapu iti panagminas, mapukpukawen dagiti mannalon ken mangngalap ti pagbiaganda ken maipanaw metten dagiti kinabaknang a sagut ti nakaparsuaan iti nasao a lugar gapu iti panangdadael ti nasao a kompania iti aglawlaw. (Bannawag, Mayo 30, 2011)

gapu iti bileg ti panunot

itay laeng nga ibagbagak iti facebook a yeskediulko no huebes agingga iti biernes ti panagsakitko-- tapno masuratko, kunak, daytay daniwko a pauluak iti UKOM. ngem bayag la a nakasangpetak iti opisina, mariknak metten ti panaggagatel 'toy karabukobko a kunam la no adda nakaangkla a bingkol. sa baengnak a baeng. ken madlawko a nasakit dagiti susuopko. pabasolek ti pannakakutorko idi rabii. ngem arbis met laeng. panagkunak, gapu ta inrekordkon iti panunotko a masapul nga agsakitak. ket dagus metten a simmuko daytoy bagi ken daytoy rikna iti pagayatan ti panunot. kayatna a sawen ngarud, nabileg a talaga met laeng ti panunot. ta maiturayanna a dagus daytoy bagi ken rikna, wenno puso kunak lattan tapno nalawlawag. diak ngamin mamati iti kuna ti maysa a gayyem maipapan iti maysa a patpatgen a nagpaituray iti panunotna. ta mamatiak ngamin a nabileg latta ti rikna, wenno ti puso. nangruna ket oriental-tayo a filipino wenno ilokano a mangbigbig iti patas a bileg ti panunot ken puso,

Diak Paboran Daytoy RH Bill

Suratek iti Ilokano daytoy stand-ko, saan a gapu ta mabutengak a makipinnapilit kadagiti Tagalog ken umiingles nga am-ammok, ken saan a gapu ta datiak a seminarista, no di ket dagiti padak nga Ilokano ti kayatko nga allukoyen itoy a pagtaktakderak—uray man metmetong laeng no isu. Kas makipagili iti Filipinas, rebbengna met siguro a mangikeddengak itoy nakakonkontrobersial a patangan. Ngarud, adtoy ti sangapulo a rason no apay a diak kumanunong iti pannakaipasa ti rh bill. 1. Makatulong a mangibayag ngem dina mapengdan ti panaglobo ti populasion. Saan a gumatgatang iti kontraseptibo wenno condom ti kaaduanna a nagaget nga aganak, kas kadagiti adda iti urban wenno slum areas ken dagiti adda iti aw-away. Ken uray no ikkam ida iti libre— babaen ti gobierno, kas pangarigan maipasa— masadutda a mangusar, kas iti kinasadut ti kaaduan kadakuada a mangpatan-ay iti panagbiagda. 2. Kaykayatko a saan koma nga agkontrol dagiti kabaelanna a patan-ayen dagiti annakna—dagiti responsable a nagann

Ayanmo?

Ayanmo? (Patarus ni Asseng iti Nasaan Ka ti Pupil) Itattay agsapa Nakariingak adda Tugot ti isem iti rupa... Sika, dungngo, ti kaduak iti tagainep Ibagak koma ita kenka.... Ngem awanka metten... Awanka gayamen... Awanka metten..... Agpabpabasol, agung-ungor iti pungtot… Agsipngeten daytoy panagkitak Gaput’ saludsod diak masungbatan... Dikan makita pay, dikan maiggaman Ti nalapsat a rupam gapu ta... Awanka metten... Awanka gayamen... Awanka metten... Ayanmo? Ayanmo? Kasla asuk a nagpukawka... (drum and lead only) Awanka metten... Awanka gayamen... Awanka metten.... Mabirokankanto met laeng (6x)

9 a Daniw ni Sam-it ken 1 a Samiweng ni Pait

ITI KAAWANMO, KASTOY A BUKODAK TI SAEM (para iti sabong a diak pulos natapaya ti panagsampagana) bilbilangek dagiti nagkukurus a naibatek iti ules bayat nga awanan-gaway, di malisian ti panagtedted ti linnaaw iti muging ket mabibineg ti amin nga urat ti kinasimbeng, sukitsukitenna ti agruprupsa a ngipen iti gugot ti di panagkir-in no sumilud dagiti lamok agingga kadagiti maudi a rimat ti alintatao ken no kuminnit dagiti kiteb kadagiti sulsulinek ti pennet ti piskel, kadagiti murdong ti siding kas iti mangkudkod iti igid ti agpakpakillo a sugat a naynay a pakatarimbangonan iti parbangon ket giddato nga ukraden ti ladawan sa paspasurotan dagiti nalilidem nga uged a nangabbong kadagiti namamaris a lagip in-inayadek nga aprosan ti pungan, ti ules, ti ikamen— tunggal karenkenda a nalabit simmuksokan ti ayamuommo a nasiputak a limmabas iti tagainepko nupay nakaparpartak a kas iti layap, amang ngem iti pettat a pannakatiag wenno iti panagtalapuagaw ti sipnget apaman a

MAYO 2011

medio adu ti leppasen ita: 1. translation ti SAMTOY: DAGITI SARITAMI DITOY, ANG AMING KUWENTO, antolohia dagiti ababa a sarita ti 13 nga agtutubo a mannurat nga ilokano a maipatarus iti tagalog. sa maipablaak. 2. translation iti tagalog ti BIN-I TI KIMAT, a nobela ni apo cles rambaud. 3. pannakaurnos dagiti mailibro a dandaniw (wen, agilibroak manen!) a pauluak iti PANANGARAKUP ITI LAYAP 4. ti pannakakompletok iti koleksion dagiti dandaniw a pinauluak iti 9 A DANIW NI SAM-IT KEN 1 A SAMIWENG NI PAIT. 5. kangrunaanna, ti pannakatiliwko iti LAYAP ken pannakaipaunegko iti MUTIA TI SABUNGANAY.