ARIEL SOTELO TABÁG

Agsaksaknap ita ti panangkontra dagiti mannalon ken mangngalap iti Gonzaga, Cagayan ken dagiti umili manipud iti pito a sabsabali nga ili ti probinsia iti panagminas iti magnetite iti ag-13,843 nga ektaria nga igid ti baybayda. Kinuna ni Salvador del Pueblo, pannakabagi ti National Democratic Front iti Cagayan Valley, a sipipinget itan a kontraenda ti panagminas ti Lian Xing Philippines Stone Carving Corp. iti Barangay Batangan iti disso a “pinadur-as ken tagtagibien dagiti mannalon ken mangngalap”. Kuna ni Del Pueblo a gapu iti panagminas, mapukpukawen dagiti mannalon ken mangngalap ti pagbiaganda ken maipanaw metten dagiti kinabaknang a sagut ti nakaparsuaan iti nasao a lugar gapu iti panangdadael ti nasao a kompania iti aglawlaw. (Bannawag, Mayo 30, 2011)

Nakemmeg ti innem a Chinese national a natiliwan nga agal-ala iti blacksand iti aplaya ti karayan iti Lal-lo, Cagayan. Innaganan ni Senior Supt. Moro Aplasca dagiti natiliw a da Lim Chen Hu, Lim Ding Mu, Lim Chan Ping, Lim Chan Bing, Lim Gwen Bi, ken Fu Ga Rong nga agpapada nga empleado ti Sanyo Philippines Mining Trade Inc., a mangiwaywayat met iti panagminas iti Filipinas. Nupay adda naipakita a pasaporte ken visa dagiti ganggannaet, awan met ti maipakitada a dokumento a mangipaneknek a legal ti panagminasda. Segun kadagiti agindeg, rabii no agminas dagiti ganggannaet ket ikargada iti maysa a lugan a para taaw dagiti makolektada. Narigatan met a nagpalutpot dagiti polis ta di ammo dagiti natiliw ti agsao iti Ingles. Nupay kasta, nakasuanen dagitoy iti panaglabsing iti RA 7942 (Philippine Mining Act), idinto a sirsiripen dagiti polis dagiti Filipino a kakumplot dagiti nainaganan nga Insik tapno maidarumda met. Naipablaak iti Bannawag, Agosto 9, 2010 a bilang.