ARIEL SOTELO TABÁG

Maisagsaganan ti antolohia dagiti napili a Daniw ni Ayat dagiti kameng ti GUMIL Metro Manila. Agpaay nga editor da Cles B. Rambaud, Juan Al. Asuncion ken Ariel S. Tabag. Pagalagadan iti Panagidatag: 1. Uray mano ti daniw nga idatag (di pay naipablaak wenno naipablaaken iti magasin, wenno dadduma pay a babasaen, wenno naipaskilen iti Internet). No naipablaak wenno naipaskilen, masapul nga adda notasion iti baba ti sinurat mainaig iti detalye ti pannakaipablaak daytoy. Segun ketdi iti pangngeddeng dagiti editor dagiti mairaman a daniw. Karbengan dagiti editor ti di mangipablaak kadagiti maidatag a daniw a di makapatar iti pagrukodanda. 2. Daniw maipanggep iti ayat ti idatag. No ayat, kunatayo, isu daytay ayat a nalimogan iti romansa; ngarud, ayat daytoy iti nagbaetan ti tao ken ti ipatpategna; saan ketdi nga ayat ti tao iti asona, wenno ayat ti aso iti tao, wenno ti tao iti pagilianna, wenno ken ni apongna a baket, wenno iti sangabotelia nga arak. Sabalinto a libro ti pakaiserkan dagitoy...

MAUDI A KALGAW Daydi ti naudi a kalgaw ti kinaagtutubo: Nagsinnublat ti gurruod ken kimat Ket iti apagdarikmat, kinamat ti pumarakapak A bayakabak dagiti lamolamo a dapanta A nagturong iti kalapaw iti sirok ti bagbag. Natuduanta latta ket naslep dagiti bagita Ngem kas iti kiaw ken nalabaga a sabong Nagtalinaed a gumaygayebgeb dagiti mata Umas-asuk dagiti kudil kagiddan Ti yaasuk ken panagangsab ti daga Bayat ti panangtagikua ti langit iti pudot A nailimed iti atiddog a kalgaw. Kabarbaro a pagteng ti kabigatanna: Nagrusing dagiti rettab ken kalunay, Nakalanglangton ti aglawlaw Ket naayatan dagiti dakulapta Iti panangaprosda kadagiti linnaaw. Dagiti dapanmo, sarunuenda Ti yuritko nga arado iti barukong ti daga Kalpasanna, maisina dagiti bin-i Iti taep— dagiti di sinagid ti buot, Nabubun-as; sa mayuper iti karayan. Iti tawa, inaldaw nga impalpalagip ti bayakabak Ti pettat a yaayna ken ti pannakaslepta Bayat ti panagtubo dagiti bunubon, kumaro Ti panagregget kadagiti kinelleng— agkinnamata...