ARIEL SOTELO TABÁG

(ti naduktalak itoy panangpadaspadasko nga agsurat iti adda bilangna, makasursuro a mangpasiken iti linia ken mangpasingdat iti imahe) berso iti marso 6-- ken apaglabesna bassit anasaas ti baybay im-imdenganka iti sirok salaysay * * * nasipngeten ti malem puraw a sarming narigat a bettaken * * * ket nagkidemak lidem malaksid isem nakarimrimat * * * kulibangbang immagep iti sampaga ungkay nagarigenggen * * * nailibay nga away apo, lumabasak pay siak nga agdaldaliasat agturong iti siudad di matmaturog uray rabii agtartaray * * * duduogan a dungon saksit' agrusing langto iti parbangon

Masansan a nalabaga ti maris ti kasaor Nangruna no kastoy nga agtabonen ti init— Awan pagilasinan ti panagtataripnong Ti talinaay, pammateg ken panagila iti barukong Nupay agsasallupangen dagiti samiweng Ti Paskua. Agkeppet, maregreg dagiti bulong Ket makilumba ti maris-daga iti sipnget A mangtagikua iti kinalangto sa agkaradapda A mangipakaammo iti bagina ti umadanin A sardam: saanen a salemsemen ti karenken A kudil iti linnaaw ti sardam— ketdi, nalamiis. Ngem agpatagikua ita iti maladaga a kannag. Kaay-ayona daytoy a buya: nababa ti tayab Dagiti tuwato, agbangabangada kadagiti ruot Ken sabsabong iti arubayan. Saan nga agsubli Iti kinaubing a maayatan a mangyappan iti insik Iti pakambong; seknan ketdi iti lagip ti kinaubing Dagiti ubbingna ket tannawaganda dagiti nababa A helikopter iti abagatan a purok. Ket bayat Ti pannakaipugso ti apuy, kunana kadakuada: Tuwato dagita, Annakko, babassit a dragon; Puoranda ti bakir, puoranda ti kapanagan… Inton dumakkelkami, pagtalawenmi dagiti drag...