ARIEL SOTELO TABÁG

  i. masiudotak a kanayon nga agdardaras no apay ketdi a naimbento ti panagdardaras kamkamakamek a kankanayon ti oras kankanayon a mangkimkimkim iti kepkepko nga anus. no kuan mikismikisek daytoy mangliwengliweng nga abut ti siudad, kas man agnanayon a sikukursong kas kadagiti sakak: intartarayanna ti tarindanum ken tambak wenno dagiti kinelleng a nakairaepan ti kinakurapay ken saning-ik. diak latta maalaw ti riknak no apay a makilinlinnetletak iti siudad a nakaigayunggayongan ti diak maalut-ot a sakak pasaray agkupit ti sentidok iti kakakamakam kadagiti agsasala nga alikudog dagiti kasla lungon a lugan.   tayabek koma ti pagobraak no agbalinak a billubillo ngem masarakak ti bagik iti dung-aw ti di maung-ungpot a pila ti naynay a madadael nga mrt— malagipko ti adu pay a pila ti pagutangan, pagbuniagan, pagbayadan ken pagtayaan lotto. no koma adda paglakuan kadagiti masaysayang nga oras no kastoy a diak maabotan ti kamkamakamek nga oras d...

Mailukip latta dagiti kortina ti gukayab ti kutimermer Ket di magawidan ti makipinnerreng iti raya ti init Nga impasngay ti nakakayang a langit: gumteb—aggiteb Ti pitik ti biag iti saklot ti nagdalungdong iti nakasinsin-aw A lamiis: isikial dagiti ramay dagiti dakulap iti sep-ang Ti punganay: ket masdaawda iti agpitpitik a sangapirit A bara ti bukel ti kaimudingan— kadagiti murdong-tarumamis Dagiti rimmurog a sanga a nalettay iti panawen ti ruros, Mapursing dagiti kristal a sabong nga inwarakiwak ti law-ang Ket in-inut nga agdissoda iti lukong ti dakulap ti umang-anges a daga.             Agkarayam ti ramay ti raya...                         Tunawenna ti kimmalukop a sipnget— Ket aggilap ti isem ti malukaisan              ...

Makikinnamatanak a kanayon—    nupay saanak nga agtaray    diak kasapulan ti nalawa nga espasio A pangtingitingan iti andur, alibtak ken paspas    ‘tay kasla addada agballa nga aso iti likudan wenno agbuangger a kabalio— sindadaan a mangdangran kaniak     ‘tay di masultipan tapno agrubuat a pumegges Nga agngudo iti naituding a uged a mapalpalakpakan. Daytoy a pannakikinnamatan    addaanak ketdi iti bukod a dana    iti bukod a kasalisal    siak laeng ti makaammo    bukodko ti amin: ti bagik ti makilumba ken ti kalumba    ti gunggona    ti pangrugian ken pagnguduan.   Daytoy a pannakikinnamatan    diak kukua ti gunggona iti panagballigi    ngem kukuak ti uyaw iti pannakapaay.   Ngem saan a diak makikinnamatan. Ta iti panagsarimadengko, adda maputed a dalan Mabalin a mayaw-awan dagiti sumaruno kadagiti tugotko  Ta mabalin a maabbonganda kadagiti ruot k...

Inyalat ni Daniel L. Nesperos ti Umuna a Gunggona iti Salip iti Daniw ti 1st Saniata Prize babaen ti daniwna a “Kasla iti Narpek a Rangaw Dagiti Maisko.” Premiado a mannaniw ken piksionista, agnaed ni DLN ken ti pamiliana iti Brgy 19, San Lorenzo, San Nicolas, Ilocos Norte a puonna. Umawat iti dua ribu a pisos (Php2,000) a premio a kuarta, sertipiko ti pammadayaw, ken tallo a libro nga Ilokano. Inyalat met ni Prodie Gar. Padios, tubo iti Simpatuyo, Santa Teresita, Cagayan ngem agnaeden iti Canada, ti Maikadua a Gunggona babaen ti daniwna nga “Atang-iti-Sarukang: Musa-ti-Kadkadua.” Umawat ni PGP iti  sangaribu ket dua gasut a pisos (Php1,200) a premio a kuarta, sertipiko ti pammadayaw, ken dua a libro nga Ilokano. Ni met Jobert M. Pacnis, ti Ammubuan, Ballesteros, Cagayan ti nangyalat iti Maikatlo a Gunggona babaen ti daniwna a napauluan iti “Makikinkinnamatak.” Umawat ni JMP iti sangaribu a pisos (Php1,000) a premio a kuarta, sertipiko ti pammadayaw, ken maysa a libro nga I...