Ni Manong Abe ken Dagiti Librona
Ni Manong Abe idi nangisagut iti kopia ti librona a "Don't Cut The Trees, Don't" iti Bannawag, babaen kada Bannawag Editor Cles B. Rambaud (kakanawanan) ken daytoy numom, agduan a tawen ti napalabas. KINAPUDNONA, pakaidayawak nga awagan iti Manong Abe. Ta no rukodem isuna segun iti nagtengna iti edukasion, research, panagilibro, partuat, musika (nabuyakon ti laingna nga agtokar iti biolin), painting, photography, literatura nangruna iti daniw, panagtempla (agparpartuat iti basi), iti tay-ak ti ecology, ken dadduma pay, nakadakdakkel isuna a tao ket rebbengna a maawagan iti kompleto a DR. ABERCIO V. ROTOR sa adda pay PhD-na. Ngem ti naisangsangayan a kinapakumbaba, kinatanang nga agsao ken kinaisemna ti pampamkuatanmi a mangawag latta iti Manong Abe. Managpabus-oy. Kunam la no nabayagkayon a nagkasinged no kasaonaka. Ket ti utekna, nakawatwatiwat nga aminen a tay-ak ti pagsiriban, mailawlawagna no apay wenno kastoy ken kasta ti maysa a banag. Iti wagas a di me...