Hudhud ken Payaw, Patawid ti Ifugao iti Sangalubongan
Ni ARIEL S. TABAG Rinetrato ti autor Maisursuro kadagiti ubbing iti Ifugao ti panangidayyengda iti epikoda a “Hudhud” agraman ti panangipategda iti payaw a partuat dagiti appoda… Maysa a buya iti Banaue Rice Terraces. Dagiti buya iti salip iti panangidayyeng iti “Hudhud” iti dua a kategoria: ubbing (ngato), ken nataengan (akin-ngato). PUDNO a natan-ok ken naisangsangayan ti maysa a partuat ti tao no sangsangkamaysa a minuli daytoy ti maysa a puli ken para iti pagimbagan ken pakaitan-okan dayta a puli ken dagiti sumarsaruno a kaputotanna. Agpada a makapatar itoy a pagrukodan ti “Hudhud” ken ti Banaue Rice Terraces, dua a naisangsangayan a patawid ti Ifugao, saan laeng kadagiti agindeg iti nasao a probinsia ken iti Filipinas no di pay ket iti lubong. Naduktalanmi daytoy bayat ti panangimatangmi iti pannakaiwayat ti Gotad Ad Ifugao wenno ti pannakarambak ti maika-44 nga anibersario ti pannakabangon ti nasao a probinsia itay Hunio 17 agingga iti 20, 2010 iti Lagawe, ti kabesera ti probinsi...