Kulibangbang, Kulibangbang
Daniw a Para Ubbing ni ARIEL S. TABAG Itlog, itlog a nagririmmuok Iti bayyabas, sua ken santol Nakapurpurawda, nakasapsapot No alaek, marugitan ‘toy ulok Budobudo, budobudo a nagkukyut Di asitgan, makasamrid uray muldot Kadagiti sangsanga, agdangandangan Maib-ibus bulong nga inda pagnaan Balay-igges a nagbibitin Ipallapallayog ti angin Di suksukiten, di bukbukitkitan Ta ni igges, aglulupoy a rummuar Kulibangbang, kulibangbang Likawlikawenna ti arubayan Nagdudumat’ maris dagiti payakna Dagiti sabsabong, agkanna (Karaman iti Bullalayaw, antolohia dagiti daniw a para ubbing, a sinurat dagiti mannaniw iti Cagayan. Manamnama a mayalnag itoy Disiembre 2012. Agpareserbakayon, gagayyem.)