PANANGARAKUP ITI IPUS TI LAYAP
PANANGARAKUP ITI IPUS TI LAYAP KEN DADDUMA PAY A DANIW Ni Ariel S. Tabag Buklen ti sumurok-kumurang a 120 a daniw, manamnama a mayalnag iti kabiitan a panawen.
Posts
No Apay Nga Agsursuratak
In-tag-nak ni Pren Sherma E. Benosa iti sumagmamano a saludsod maipanggep iti panagsurat. Sinungbatak man, kas iti sumaganad: why do you write? agsursuratak gapu ta iti panagriknak, nakayanakak ti agbalin a mannurat. uray idi addaak iti seminario, karaman ti panagsurat iti kanta, agdaniwdaniwakon uray saan a maipablaak. idi rimmuarak iti seminario, naikkannak iti gundaway nga ad-adda nga agpokus iti nakayanakak a pagirayan-- ti panagsurat. idi agangay, naduktalak nga adda gayam dakdakkel nga akem ken responsibilidad dagiti mannurat nga ilokano-- ti mangtaginayon iti literatura ilokano ken mangpadur-as iti pagsasao. ket maaramid laeng dayta no agtultuloy dagiti mannurat nga agsurat iti piesa nga ilokano nga in the process, makatignay kadagiti tumulong iti daytoy a panggep. ngarud, agsursuratak gapu ta kayatko a yebkas ti marikriknak (bareng maka-inspire met iti sabali) ken tapno matulongan ti literatura ken pagsasao nga ilokano. apay nga iti ilokano nga agsursuratak? malaksid a na...
5 Ilokano books, finalists iti National Book Award
Lima a libro nga Ilokano a sinurat dagiti Ilokano ti napili kas finalists iti nadumaduma a kategoria iti maika-31 a National Book Awards nga intuyang ti Manila Critics Circle ken ti National Book Development Board. Isu dagitoy: Karapote: Antolohia Dagiti 13 a Nasuerte a Sarita ni Ariel S. Tabag a nominado iti Ilokano Fiction; Samtoy: Dagiti Saritami Ditoy, Ang Aming mga Kuwento nga impatarus ni Ariel S. Tabag (Filipino Anthology); ken 29 A Napili A Sarita Iti Iluko, inedit da Juan Al. Asuncion, Ariel S. Tabag, ken Efren A. Inocencio, Kastoy Nga Imbunubonmi Dagiti Balikas (Antolohia Dagiti Daniw Iti Iluko), inedit da Joel B. Manuel ken Ariel S. Tabag; Nabalitokan a Tawid: Antolohia Dagiti Napili a Sarita Dagiti Ilokano, inedit da Juan Al. Asuncion, Joel B. Manuel, ken Ariel S. Tabag, (agpapada a nominado para iti Ilokano Anthology). Maammuan ken mapadayawan inton Nobiembre 17 dagiti mangabak. Daytoy ti umuna a gundaway a mairaman dagiti libro nga Ilokano iti nasao nga awards. ...
Ay, Biag!
Itoy Agosto 16, agtawenakton iti tallopulo ket uppat. Kitaem laeng met. Ipagarupko no maustelak idin agtawenak iti duapulo ket dua. Thank you, Apo a Namarsua. Tunggal agkasangayak, gundaway nga arisitek met ti kaunggan. No lugan koma, tiempo ti panangpadalus iti makina. Kaano laeng a mapampanunotko a ti lubong ti komersialismo ken kapitalismo ti mangpatpataray a talaga iti biag ti tao, nangruna iti siudad. Ti agdama a biagko ita a masapul nga agtrabahoka tapno agbiagka; wenno makigiddan iti askaw tapno saanka a mabati a nakanganga, sabali iti biagko idi addaak pay laeng iti seminario; wenno idi agbutbutegak pay laeng a supot idiay awaymi. (Agasem, tiempo ti kasangay wenno "panangpadalus iti makina" ngem addaak nga agtartrabaho-- 48 hours straight!) Ad-adda pay a pinarikut ti biag ti kaadda ti pamilia. Ala wen, dakkel a banag a makariknaka iti pammateg manipud iti asawa ken kadagiti putotmo. Ngem ti responsibilidad a mangtimon iti daytoy a pamilia, ilgatenna ti dakke...
Agosto ken Panagtutudo
Inyanuden ti bayakabak Dagiti nagango a bulong Uray dagiti apagrusing a bin-i— Kalanglangtuanda Matuktukkol sa maitanemda Iti napegges a layus Saanen a makita pay Kas iti aweng ti gitarak Diakon mangngegan ti samiweng A napartuatko idi maysaak Nga agtutubo a napnuan arapaap Ta kabaelak itan ti mamaggidiat Iti karasakas ti bayakabak Ken iti samiweng ti gitara Uray agpadadan A tinallikudan ti kalman… Agosto 13, 2012 Photo credit: article.wn.com