Nalabaga ti Maris ti Kasaor

Masansan a nalabaga ti maris ti kasaor
Nangruna no kastoy nga agtabonen ti init—
Awan pagilasinan ti panagtataripnong
Ti talinaay, pammateg ken panagila iti barukong
Nupay agsasallupangen dagiti samiweng
Ti Paskua. Agkeppet, maregreg dagiti bulong
Ket makilumba ti maris-daga iti sipnget
A mangtagikua iti kinalangto sa agkaradapda
A mangipakaammo iti bagina ti umadanin
A sardam: saanen a salemsemen ti karenken
A kudil iti linnaaw ti sardam— ketdi, nalamiis.

Ngem agpatagikua ita iti maladaga a kannag.
Kaay-ayona daytoy a buya: nababa ti tayab
Dagiti tuwato, agbangabangada kadagiti ruot
Ken sabsabong iti arubayan. Saan nga agsubli
Iti kinaubing a maayatan a mangyappan iti insik
Iti pakambong; seknan ketdi iti lagip ti kinaubing
Dagiti ubbingna ket tannawaganda dagiti nababa
A helikopter iti abagatan a purok. Ket bayat
Ti pannakaipugso ti apuy, kunana kadakuada:
Tuwato dagita, Annakko, babassit a dragon;
Puoranda ti bakir, puoranda ti kapanagan…

Inton dumakkelkami, pagtalawenmi dagiti dragon,
Kunada. Mabirokakto ti igam a mangbugaw
Iti ania man nga ayup a mangdidigra iti ulimek.
Birokekto ti ramit a mangdepdep iti uray
Sangkabassit a rissik ti susik. Ngem apay
A nagbalin a dalan ti panungpalan ti libro,
Unibersidad, ken estado? Adda kadi kantidad
Ti lua a pangugasna iti babakna a nangipaay
Kadagiti annakna iti pagilian a dina met ammo
Ti pakainaiganna? Daytoy ti isagutna iti tanem
Ti kasimpungalan a nangsalaknib iti daga?
Manon a yaay ti Mannubbot a binirbirokna
Dagiti sungbat kadagiti kapanagan ken law-ang?
Ngem nagaon dagiti balikas iti nakaun-uneg,
Nakasipsipnget a rangkis ket nasayyasayyada
A nangasak iti kasipngetan a nakaitanemanda.

Agtaeng ti amin iti nakaikarianna, ket ti saem,
Iti laeng puso a manangilala, manangipateg.
Wen, inton bigat, aggulgulgol tapno yanudna
Ti ladingit iti naapres a karayan. Kupinenna
Ti panes. Agtalek iti lakasa a mangipempen
Kadagiti nasasam-it ken napapait a lagip
A dinto pulos mangsugat, mangsair iti agrusing
A panagdarepdepna iti init a di nangikulbo
Ketdi nangpabus-oy iti bayakabak.

Nangisiten ti maris ti kasaor, tinagikuan
Ti atiddog ken nalam-ek a rabii. Nupay iddepento
Dagiti agpasag a simutsimot ti pagsaingan,
Ammona, namnamaenna, adda natadem a kimat
A mangpisang iti kasipngetan a nangsallukob
Iti agsapa a mangidateng kenkuana iti baro
Nga anag dagiti lawag, balikas, ken samiweng…

ARIEL S.TABAG
Kukua ti autor ti copyright