X

Idinto ta nakaul-ulimek ti kampanario ti siudad,
Nakalawlawag, saan a malmaldaang ti init.
Tangadek ti ballaag ti pagorasan: agur-urokka
Bayat ti panagur-urayda nga agsasainnek iti lagip
Ti ipupusay a nangisagut iti biag nga awan-inggana.

Mangrikna ti rupa: agayunoak, manglanganak iti pammigat
Ken merienda. Awanan-bain metten ti konsensia—
Mano a bulan kadin a pangngaldaw ti umuna a grasia
Ti boksit? Ket ita, irasrasonak nga amang a natantan-ok
Ti mangregreg iti ling-et para iti tunggal onsa ti gatas
Dagiti putot ngem iti agpailansa iti sango dagiti tattao.

Daytoy ti pammatik: iti amin a disso, adda ti Apo Dios.
Pakawanendak ta diak ammo ti eskediul ti Nazareno:
Agrasrasawak nga iti ungto daytoy a trapik, napudot ti ulo
Dagiti nagdidinnungpar. Mano kadi nga Ave Maria,
Amami, ken Gloria ti mangpakawan iti kinainosente
Wenno apag iti buya ti agmatuon: maibilag dagiti dapan
Iti kalsada a pagtagilakuan iti an-anib, gasat ken kanibusanan?

Daytoy ti laonen ti trabahok: aruat ti ina ti kamiseta—
MJ iti sango, Jesucristo iti likud; narugit ti dila ti baro
Bayat ti panangyabagana iti Pasion; nayurit iti rupa ti ubing
Ti sapatos; iti sarming, kasla siak met laeng ti drayber ti bus.

Nakaul-ulimek ti aglawlaw ket imakmakiniliak ti damdamag
Iti malem a mabisinak, sakbay ti oras ti ipupusay ni Kristo.


Bannawag, Marso 24, 2008