Dandaniw iti 2004
(Dagiti dandaniw a naipaskil iti daan a blogko iti 2004 ti kayatko a sawen. Sapay koma ta saan a maibilang a panag-recycle daytoy ar-aramidek-- ur-urnosek laeng dagiti naipaskilko ta kayatkon a panawan ti daan a blogko ket daytoy koman ti pagbayagak. Ken, manen, panagamiris metten iti bukodko a panagdur-as kas mannurat-- ta mabalin a nadurdur-as dagiti immun-una a nasurat ngem ita ta tumaeng met dataon; ket nasayaat laeng no adda met la pagturturongan iti panagsuratsurat.
Agsasabali met ti panagnotariok kadagiti daniw-- adda dagiti no kaanoda a nasurat; adda met dagiti no kaanoda a naipablaak.
Ket dagitoy man dagiti dandaniw:)
Libut
Ilibut manen dagiti tumengmi dagiti saem iti abaga
nga impabaklay dagiti rapas ken buli nga ima.
Manon a siglo nga inaradomi dagiti kinelleng
a nagapitanmi iti sangol iti balsaenmi manen
a kaban nga insikog ti bullalayaw dagiti malem
a rinakemmi dagiti ramaymi tapno masagneban
iti nalabaga ti aglulusiaw a dawa? Ay, itugkelmi
latta dagiti kandela a batonlagip dagiti ginamulomi
a ling-et ken lua, agibit iti litania ti saraaw ken
alipaga ti agmatuon a nanguram kadagiti rimat
iti matami. Madepdep ti gil-ayab tunggal perngenmi
dagiti nagsayasay a lua ken dara iti krus. Ngem ania,
aya, ti kinatan-ok iti kiraos? No koma agorasion
ti kampana, yawengna dagiti ikkis iti kaunggan
tapno agpingkida ken ti kimat, gurruodenna
ti matmaturog a langit. Nabayagen a mawaw ti daga
iti panagibi dagiti ulep: inumenda payen dagiti diro
iti barukongmi a nalimogan iti tubbog dagiti dawa,
nateng, prutas a pinespes dagiti bagyo ken igaaw.
Anansata, lua ken dara ti idatonmi iti altar ti katedral.
Nasurat idi Agosto 29, 2004
anibersario
nagkarita iti nagan ti ayat.
digosek dagiti ubbing iti panagibi:
kasilpo ti panagsikog ken panagaw-awir.
ita nga aldaw a kasilpo met dagiti pekpekkel
ken salidummay iti sardam. nabirtud met
ti maimaldit nga inosente a ray-aw
iti pingping a nalidem a dana itan
ti nabuslon a lua ti parbangon.
nagkarita iti rigat ken nam-ay.
innawak dagiti lamina ti naulimek
a pammigat; bay-ak a sul-oyen
ti lababo dagiti pangrem a nalimogan
iti giteb ti barukong.
lampasuek dagiti naimilkat a kusilap
ti pitak. sagadek ti tapok a nagsusuon
iti babantot ti butuan a dakulap.
ay, makipagladingit ti sagad iti panagsan-ek
dagiti takiag ken gurong.
igabsuonko iti baniera dagiti pagan-anay
ti dang-as ti aircon a garakgak ti opisina
ken bidang ti dinekadan a sainnek
ti kosina. napanaas ti mapirpirsay
a ramay iti rungsot ti chlorox a manggelgel
iti kinatangsit ti lipstick a kimmawiwit
iti kinatan-ok ti puraw a kuelio.
nagkarita iti kinaagnanayon.
no kiwarekon dagiti ramen ti pangrabii,
isagpawko met ti panagugis a naimas koma
ti napait, naapgad, naalsem ken naadat.
agpakadan ti sardam. narnekanen
dagiti ubbing iti lallay a nangbalkot
iti saem. awagannak tapno uksotek
dagiti mediasmo. labaranka iti alimpatok
ti urok bayat ti panagkallautang ti umel
a dung-aw iti kannag a kinilga
ti nayareng-eng a ganggannaet
a birngas ni ayat…
Naipablaak iti Bannawag iti maysa kadagiti bilangna iti Pebrero, 2004.
Reberendo
Iwaragawagko ti kinatan-ok iti panagtuok--
kas iti pannakailansa iti krus
wenno pannakaibalud iti agsusukot
a sotana uray sumgiaben ti lubong.
Aglemmeng latta ti mabuteng nga alintatao
iti mata dagiti debosionado a domingo
tunggal pespesek dagiti lua ken ling-et
ta aglimogda a dara nga agayus iti kararua
a ganggannaet iti bara ti daga wenno masaek
dagiti murkat ken sikog ta malinay nga ostia
a pangrennek kadagiti didiosen a patron
ti malakaniang.
Ilawlawagko dagiti senial ti daradara
a malem a mangur-uram iti rimat
ti bullalayaw: asidegen ti panagampayag
ti puraw a kalapati a nagpayak
iti balitok a gameng ti puli. Panawen ita
ti panagibtur iti kiraos ken panagrekka
ti lasag; panaglantip dagiti ladingit
ti parbangon ken lua ti sipnget;
pannakaidaya ti biblia iti lamisaan
a kutiman dagiti balo ken ulila
iti sardam a ngilangilan dagiti mabisin
a saltek.
Siak ti mangibabaet kadagiti darepdep:
panaglanglang iti dulang a nakaidayaan
ti rennek; pannakailibay iti abel a naburdaan
iti talinaay; pannakadayas iti linnaaw
a pagan-andapan ti agnanayon. Ngem
petpetak pay laeng ti grasia ta yalamanokayo
iti politiko, ibatekkayo iti lino a nangkagay
iti simbaan, imalditkayo iti leksionario
dagiti natan-ok.
Agbuggoak iti agua bendita ta suknoren
ken lemmesenna dagiti aliaw ken alingget
ken duadua iti barukong. Pakawanendak…
Naipablaak iti Bannawag iti maysa a bilangna iti Agosto, 2004.
Panagtaeng
(ken ni ncc)
Kari daytoy iti panagtaeng, kas iti panangsallukob ti sipnget
Iti alipaga dagiti nalabaga ken apuy a nanguram kadagiti pan-aw
Ken ledda iti uma: umok idi dagiti beklat ken banias, uritan
Dagiti arado, abrasaen dagiti dakulap, isuda a mangpekpekkel
Kadagiti bukel. Kari a kas kaburnok dagiti rettab nga agrusing
Kalpasan nga imbaas ti layus ken didigra iti umuna a bayakabak
Ti Mayo ta idateng latta dagiti linnaaw ti langto, yagekda
Ti nasalemsem a panagibi ti langit.
Ti panagtaengko ket kas iti panagkanabsuor ti dalag iti waig,
Aglang-ayak iti anasaas ti natarnaw nga ayat ti kawayan,
Kannaway ken nuang. Agtaengak kas iti itatapog ti dayag
Ket urnongenna iti barukong dagiti tallugading ti danum
Bayat ti panangsubadna iti isem ti panagpayapay ti pagay,
Malagipna latta ti bara a nagkarayam iti dakulap, masansan
Bayat ti panangestoria ti baro iti sariugma ti bullalayaw
A nagsaklot iti itlog ti kannaway.
Agkariak nga agtaeng kenka kas bulong iti kinalangto,
Natarnaw kas iti waig iti asul a tangatang.
Naipablaak iti RImat iti Nobiembre, 2004 a bilang.
Panagpakawan
panagpakawan daytoy iti diak isasangbay
idi pagammuan ta nagbayakabak:
nanglayus kadagiti tanap, desdes,
alog... (no kaano pay a nagtalaw
ti langto iti bulong ken salemsem
kadagiti pussuak ken waig,
napatgan ti litania dagiti balo
ti ayamuom ken samiweng ti bangkag
ken bakir, nga iti panagladingitda;
mayanud dagiti rugit ken tapok,
agpanes ti tangatang, agdung-aw
ti aglawlaw.) ita koma a sangalek
ti bullalayaw iti rimat ti matam
wenno yuritko ti paludip ti bituen
ita pingpingmo a sagudayton
ti kallid. dispensarem, wen,
ta piesta ita dagiti tukak;
kinusilapandak dagiti kuriat.
agkariak a kalpasan ti bayakabak,
sumangbayak nupay ammok, wen,
a natapok ti naisangrat a pagtugawak.
Nasurat idi Pebrero 24, 2004.
Agsasabali met ti panagnotariok kadagiti daniw-- adda dagiti no kaanoda a nasurat; adda met dagiti no kaanoda a naipablaak.
Ket dagitoy man dagiti dandaniw:)
Libut
Ilibut manen dagiti tumengmi dagiti saem iti abaga
nga impabaklay dagiti rapas ken buli nga ima.
Manon a siglo nga inaradomi dagiti kinelleng
a nagapitanmi iti sangol iti balsaenmi manen
a kaban nga insikog ti bullalayaw dagiti malem
a rinakemmi dagiti ramaymi tapno masagneban
iti nalabaga ti aglulusiaw a dawa? Ay, itugkelmi
latta dagiti kandela a batonlagip dagiti ginamulomi
a ling-et ken lua, agibit iti litania ti saraaw ken
alipaga ti agmatuon a nanguram kadagiti rimat
iti matami. Madepdep ti gil-ayab tunggal perngenmi
dagiti nagsayasay a lua ken dara iti krus. Ngem ania,
aya, ti kinatan-ok iti kiraos? No koma agorasion
ti kampana, yawengna dagiti ikkis iti kaunggan
tapno agpingkida ken ti kimat, gurruodenna
ti matmaturog a langit. Nabayagen a mawaw ti daga
iti panagibi dagiti ulep: inumenda payen dagiti diro
iti barukongmi a nalimogan iti tubbog dagiti dawa,
nateng, prutas a pinespes dagiti bagyo ken igaaw.
Anansata, lua ken dara ti idatonmi iti altar ti katedral.
Nasurat idi Agosto 29, 2004
anibersario
nagkarita iti nagan ti ayat.
digosek dagiti ubbing iti panagibi:
kasilpo ti panagsikog ken panagaw-awir.
ita nga aldaw a kasilpo met dagiti pekpekkel
ken salidummay iti sardam. nabirtud met
ti maimaldit nga inosente a ray-aw
iti pingping a nalidem a dana itan
ti nabuslon a lua ti parbangon.
nagkarita iti rigat ken nam-ay.
innawak dagiti lamina ti naulimek
a pammigat; bay-ak a sul-oyen
ti lababo dagiti pangrem a nalimogan
iti giteb ti barukong.
lampasuek dagiti naimilkat a kusilap
ti pitak. sagadek ti tapok a nagsusuon
iti babantot ti butuan a dakulap.
ay, makipagladingit ti sagad iti panagsan-ek
dagiti takiag ken gurong.
igabsuonko iti baniera dagiti pagan-anay
ti dang-as ti aircon a garakgak ti opisina
ken bidang ti dinekadan a sainnek
ti kosina. napanaas ti mapirpirsay
a ramay iti rungsot ti chlorox a manggelgel
iti kinatangsit ti lipstick a kimmawiwit
iti kinatan-ok ti puraw a kuelio.
nagkarita iti kinaagnanayon.
no kiwarekon dagiti ramen ti pangrabii,
isagpawko met ti panagugis a naimas koma
ti napait, naapgad, naalsem ken naadat.
agpakadan ti sardam. narnekanen
dagiti ubbing iti lallay a nangbalkot
iti saem. awagannak tapno uksotek
dagiti mediasmo. labaranka iti alimpatok
ti urok bayat ti panagkallautang ti umel
a dung-aw iti kannag a kinilga
ti nayareng-eng a ganggannaet
a birngas ni ayat…
Naipablaak iti Bannawag iti maysa kadagiti bilangna iti Pebrero, 2004.
Reberendo
Iwaragawagko ti kinatan-ok iti panagtuok--
kas iti pannakailansa iti krus
wenno pannakaibalud iti agsusukot
a sotana uray sumgiaben ti lubong.
Aglemmeng latta ti mabuteng nga alintatao
iti mata dagiti debosionado a domingo
tunggal pespesek dagiti lua ken ling-et
ta aglimogda a dara nga agayus iti kararua
a ganggannaet iti bara ti daga wenno masaek
dagiti murkat ken sikog ta malinay nga ostia
a pangrennek kadagiti didiosen a patron
ti malakaniang.
Ilawlawagko dagiti senial ti daradara
a malem a mangur-uram iti rimat
ti bullalayaw: asidegen ti panagampayag
ti puraw a kalapati a nagpayak
iti balitok a gameng ti puli. Panawen ita
ti panagibtur iti kiraos ken panagrekka
ti lasag; panaglantip dagiti ladingit
ti parbangon ken lua ti sipnget;
pannakaidaya ti biblia iti lamisaan
a kutiman dagiti balo ken ulila
iti sardam a ngilangilan dagiti mabisin
a saltek.
Siak ti mangibabaet kadagiti darepdep:
panaglanglang iti dulang a nakaidayaan
ti rennek; pannakailibay iti abel a naburdaan
iti talinaay; pannakadayas iti linnaaw
a pagan-andapan ti agnanayon. Ngem
petpetak pay laeng ti grasia ta yalamanokayo
iti politiko, ibatekkayo iti lino a nangkagay
iti simbaan, imalditkayo iti leksionario
dagiti natan-ok.
Agbuggoak iti agua bendita ta suknoren
ken lemmesenna dagiti aliaw ken alingget
ken duadua iti barukong. Pakawanendak…
Naipablaak iti Bannawag iti maysa a bilangna iti Agosto, 2004.
Panagtaeng
(ken ni ncc)
Kari daytoy iti panagtaeng, kas iti panangsallukob ti sipnget
Iti alipaga dagiti nalabaga ken apuy a nanguram kadagiti pan-aw
Ken ledda iti uma: umok idi dagiti beklat ken banias, uritan
Dagiti arado, abrasaen dagiti dakulap, isuda a mangpekpekkel
Kadagiti bukel. Kari a kas kaburnok dagiti rettab nga agrusing
Kalpasan nga imbaas ti layus ken didigra iti umuna a bayakabak
Ti Mayo ta idateng latta dagiti linnaaw ti langto, yagekda
Ti nasalemsem a panagibi ti langit.
Ti panagtaengko ket kas iti panagkanabsuor ti dalag iti waig,
Aglang-ayak iti anasaas ti natarnaw nga ayat ti kawayan,
Kannaway ken nuang. Agtaengak kas iti itatapog ti dayag
Ket urnongenna iti barukong dagiti tallugading ti danum
Bayat ti panangsubadna iti isem ti panagpayapay ti pagay,
Malagipna latta ti bara a nagkarayam iti dakulap, masansan
Bayat ti panangestoria ti baro iti sariugma ti bullalayaw
A nagsaklot iti itlog ti kannaway.
Agkariak nga agtaeng kenka kas bulong iti kinalangto,
Natarnaw kas iti waig iti asul a tangatang.
Naipablaak iti RImat iti Nobiembre, 2004 a bilang.
Panagpakawan
panagpakawan daytoy iti diak isasangbay
idi pagammuan ta nagbayakabak:
nanglayus kadagiti tanap, desdes,
alog... (no kaano pay a nagtalaw
ti langto iti bulong ken salemsem
kadagiti pussuak ken waig,
napatgan ti litania dagiti balo
ti ayamuom ken samiweng ti bangkag
ken bakir, nga iti panagladingitda;
mayanud dagiti rugit ken tapok,
agpanes ti tangatang, agdung-aw
ti aglawlaw.) ita koma a sangalek
ti bullalayaw iti rimat ti matam
wenno yuritko ti paludip ti bituen
ita pingpingmo a sagudayton
ti kallid. dispensarem, wen,
ta piesta ita dagiti tukak;
kinusilapandak dagiti kuriat.
agkariak a kalpasan ti bayakabak,
sumangbayak nupay ammok, wen,
a natapok ti naisangrat a pagtugawak.
Nasurat idi Pebrero 24, 2004.
Comments
Post a Comment