ARIEL SOTELO TABÁG

Iti Dayta a Lapsat (Patarus wenno ad-adda nga interpretasion iti "Just the Way You Are" ni Bruno Mars. Mangngeg ditoy . O dagiti matana Awan pangatiw rimat dagiti bituen ‘Diay buokna Nagmayat man ‘ta lugayna, gyem Nakapimpintas Inaldaw ibagak kenkuana Ala, isu no isu No kasta a dayawek Dinak patpatien Ket anian, anian Aglidayak ta dina makita ti makitak Ngem no saludsodenna no kasanot’ lapsatna Kunak No makitak ta rupam Awan pulos ti kayatko a baliwan Ta naisangsangayanka Iti dayta a lapsat Ket no umisemkan Agsardeng ti lubong ket matmatannaka Ta, bebe, naisangsangayanka Iti dayta a lapsat Dayta nay bibig Uray agkak nga agmalmalem no kayatna Dayta a katawa Tiptipdenna ngem kaykayatak met Ket nakapimpintas Inaldaw nga ibagbagak kenkuana Ay, ngem ibagak manen, Dungngo Diak dinawat nga agbaliwka No kayatmo a napintaska iti uray la Kastanan ta lugaymo, Bebe Isu a dimon salsaludsoden No nalapsatka Ta ibagak kenka No makitak ta rupam ...

Ti awagko iti panangipatarus (translation) ket panagiyalison. Ta uray no agpadpada ti baso (lengguahe) a pangyakaran iti danum (literary work/s), agkurangton (latta) ti danum a mayalison. Di nakarkaron no agsabali ti sukog dagiti baso?

(Adtoy ti sarita a "Karapote" nga ipaskilko manen. No kanta koma, isu daytoy ti carrier single ti librok a Karapote, Antolohia Dagiti 13 A Nasuerte A Sarita . Barbareng no ad-adu pay ti agorder tapno mapasublik met 'diay puonak a nagintutured nga agilibro. Pagimbaganna daytoy nga insungsong da Gayyem Jaime Raras ken Tanud Joel B. Manuel, damagko ket mangiruar metten iti libro da Tanud Roy V. Aragon, Mareng Aileen R. Rambaud, Madam Estela Bisquera-Guerrero. Ali, umad-adu koma pay ti listaan, ket agbalin pay daytoy a panagilibro a ramit a pangiruaran kadagiti naisangsangayan a partuat a saan laeng nga agbalin a lakasa dagiti naipablaaken a sinurat. Kas itay kuna ni Asseng, adda iti tao a napintas ti panggepna ti suerte nga aglaplapusanan ken nawalat. Para iti Literatura dagiti agsidsida't saluyot ken nangisit ti sikona. Nayonna: Ti ladawan ket naala idi Abril 14, bayat ti panagrubrubuatko a mapan iti Dap-ayan 2011, ti maika-43 a Nailian a Kombension ti GUMIL Fi...

Abagat Aprosan ti abagat daytoy rupak— Namaga, nakersang, napudot dagiti dakulap, Ket mariknak a kukua daytoy ti pimmusayen: Nalamiis ti rupam, apok, nalamiis Dagiti matam, nalamiis dagiti lapayagmo. Awan ti maimatangak nga aglukat a ridaw No di tuktok dagiti kabalbalayan— agduduma A maris, agkakatingra a maris Ket mapuoranak iti tengnga ti nasalemsem A Disiembre a ti panagmaymaysa ket kinalam-ek. Saksiak iti panagasuk iti ngiwat ti agkaarruba Dagiti numero dagiti tinagtagainepda a padaya Dagiti diputado, mayor, hepe, padi, obispo. Di agpadpada dagiti ibagbagada Ngem natulagda a numero daytoy ti kinasaliwanwan. Maysa nga arte ti panagpekpekkel iti kawitan Iti parbangon bayat ti panangar-arapaap Dagiti lallaki iti nalabon a dulang. Agtubo dagiti pasdek iti kuppokuppo Dagiti uong idinto a dagiti arkitekto ti siudad Agbalinda a madaydayaw a didiosen ti arte. Iti maysa a nalamiis a tiendaan iti nagkurusan Imminumak iti basi a nalaokan iti apdo ti beklat Ket in...

Lagip iti Aruo ( para iti Brgy Caroan, Gonzaga, Cagayan nga awanen ti aruo wenno salengna) No mangngegam laeng, Anib, ti samiweng Dagiti aruo, maawatam ti panagem Dagiti umili a nangiyanag iti asin Iti biag— ta isuda, bisbisongen ti dalluyon Ngem kas iti niog, nipa, kandaruma ken tangrib, Kas iti soldado dagiti aruo nga iti maminsan a saplit Ti dalluyon, kumpet dagiti asin ket agbalin a bato Ken darat agingga nga awan ti mabati malaksid iti lagip Ita, dumanarudor ti dalluyon— isubsublina Dagiti sabidong ken basol nga imbelleng Dagiti agkakarimat a sibilisasion Inton awanen ti pangyulian kadagiti pagtaengan Isuda dagiti umuna nga agbalin a bato ken darat Nasurat idi Marso iti aldaw sakbay ti ginggined ken tsunami iti Japan.

Alimpatok: Antolohia dagiti Erotic a Daniw dagiti Ilokano, Isagsaganan ti Daniw ken Basi Maisagsaganan ti Alimpatok: Antolohia dagiti Erotic a Daniw dagiti Ilokano. Ipablaak daytoy ti Daniw ken Basi, maysa a tignay dagiti mannaniw nga Ilokano. Agpaay nga editor da Roy V. Aragon, Mighty C. Rasing ken Ariel S. Tabag Pagalagadan iti Panagidatag: 1. Uray mano ti daniw nga idatag (di pay naipablaak wenno naipablaaken iti magasin, wenno dadduma pay a babasaen, wenno naipaskilen iti Internet). No naipablaak wenno naipaskilen, masapul nga adda notasion iti baba ti sinurat mainaig iti detalye ti pannakaipablaak daytoy. Segun ketdi iti pangngeddeng dagiti editor dagiti mairaman a daniw. Karbengan dagiti editor ti di mangipablaak kadagiti maidatag a daniw a di makapatar iti pagrukodanda. 2. Erotic a daniw ti idatag. No erotic, kunatayo, addaan iti sabali nga elemento a manglibtaw iti maysa a gagangay a daniw ni ayat, maipangep man dayta iti panagyala, naun-uneg a sensualidad, wenno e...

(Pakauna ti Nabalitokan a Tawid, antolohia dagiti 18 a sarita dagiti Ilokano. Mayalnag inton Abril 15, 2011 bayat ti umuna a rabii ti Dap-ayan 2011, ti maika-43 a Kombension Nasional ti GUMIL Filipinas, ti gunglo dagiti mannurat nga Ilokano iti Filipinas ken iti sangalubongan, iti Cabugao, Ilocos Sur. Maawis ti amin a dumar-ay iti nasao a panagyalnag ta malaksid a makitayo iti personal dagiti autor, adda discount-yo iti gatangenyo a libro:D) Tagnawa Met Ti Panangyikub Iti Nabalitokan A Tawid PANAWEN itan ti panangipan iti ikub dagiti sinurattayo tapno ditanto a mapili dagiti agbaakan iti sarusar ti kurditan. Ket kas itay napan a tawen, tagnawa manen daytoy a panangyikub kadagiti gapuanan. Itay napan a tawen, dua a libro ti tinagnawa dagiti mannurat nga Ilokano babaen ti panangidiaya ti GUMIL Filipinas. Maysa nga antolohia dagiti sarita ken maysa nga antolohia dagiti daniw. Iti daytoy a panaggiikub, adda laeng 18 a sarita a napili. Nataladan a kasta agsipud iti diktar ti...

SANGKABASSIT A PAKAUNA NASUERTE, kunak, kadagiti sarita a nairaman iti daytoy nga antolohia ta manmano met ti ababa a sarita nga Ilokano ti mailibro. No apay a 13, gapu ta mamatiak nga awan iti numero ti kinamalas. Manipud iti 2003 agingga iti 2010 a nasurat dagiti sarita a nairaman ditoy— nupay naipablaak iti 2011 ti “Ti Balay”. Iti ababa a pannao, nasurat dagitoy a sarita kabayatan ti umuna a dekada a panagsursuratko (naipablaak iti Bannawag ti umuna a saritak idi 2001) nga ibilangko met nga umuna nga addangko iti literatura. Kas naibagbagakon, kayatko la unay a mailibron dagitoy tapno maidalimanekkon, ken maibinglayko manen, ket marugiakon man metten ti maikadua a dekada wenno yaaddang. Sumagmamano kadagitoy ti nangabak kadagiti salip, ken naipablaaken kadagiti antolohia nga impablaak ti GUMIL Filipinas. Ngem nairamanda iti daytoy a libro gapu ta mamatiak, karamanda iti 13 a nasusuerte a sarita a nasuratko. Kinutik bassit dagiti sarita manipud iti orihinal a pannakaipab...

O tattao ti Sion, agdir-i a sirarag-o/ Ti Ari ti Israel, sumangbayen kadakayo... Kas man iti panagtalukatik dagiti mata ni Along iti panangsaraboda kadagiti umuna a sinamar iti daya ti panagbitek ti barukongna iti nasinggit a natinggaw a boses dagiti sangapulo-ket-dua nga “angheles”—dagiti kaklasena iti maikapat a tukad ti primaria­— a nabaduan iti nagayad a puraw. Naikapet kadagiti bukotda dagiti kasla pudno a payak. Sinallukoban ti samiweng ti patio ti simbaan ni Santo Domingo de Guzman iti laksid ti sangapulo nga agpa a baet ti uppat a babassit nga entablado a ‘yan ti saggatlo nga “angheles”. Nalikmut dagiti entablado kadagiti tattao a mangitagtag-ay kadagiti palaspas— nga iti tallo a tawen a panagsakristanna, nadlawna manen a bulong ti palmera kadagiti taga-poblasion ket naubing pay a bulong ti niog a nalagalaga kadagiti naggapu iti away a nagdaliasat a nakatambubong iti parbangon. Sinarunoda— isuna ken tallo pay a sakristan: da Marianing, Ambong, ken Alejo— ti dua a kura: ni Padre...

Tunggal Tangadek ti Ariwanas (ti daniw a pinaabayan ni Jobert Pacnis) Tunggal tangadek ti ariwanas Makitkitak ti panagmaymaysam Iti kasipngetan Awanan saripda ti kuppokuppom Iti kannag Iti ania man nga ibuyat ti tangatang No addaka koma ditoy a disso A dagiti dapan, mariknada ti anges Ti daga; dagiti dakulap, appupuenda Ti salemsem dagiti linnaaw, Ipalagipko a kabaelan nga idul-o Dagiti sabidong iti bagi Kas iti panangidul-o ti maladaga Kadagiti pungtot ken sanaang A nakunnotna iti barukong Ti natirtiris nga ina Uray no ita, masapul nga arub-obem Ti nagpespesan ti amin a napait iti lubong. Sagpaminsan, supringem ti boksitmo, . supringem ida a di mangikaskaso . iti kayatmo Sagpaminsan, bay-am nga ibagnosnaka . dagiti bituen Ta ditoy sangkatulnek A batog dagiti nagririmmuok a rimat Adda disso a nawayaka nga umanges, . nga umaddang, . a makikinnibin... AST 030811

Agpaay a kangrunaan nga agsarita ni Dr. Priscilla Supnet-Macansantos, pangulo ti National Commission for Culture and the Arts’ National Committee on Literary Arts (NCCA-NCLA), iti Maika-43 a Kombension Nasional ti GUMIL Filipinas (GF), ti gunglo dagiti mannurat nga Ilokano iti Filipinas ken iti sangalubongan. Mannaniw nga Ilokana ken tubo iti Narvacan, Ilocos Sur ken Chancellor ti University of the Philippines-Baguio, warwaren ni Macansantos ti tema ti kombension a “Papanam, Literatura Ilokana?”. Naawagan iti Dap-ayan 2011, maiwayat ti kombension itoy Abril 15-17 iti Cabugao Beach Resort, Cabugao, Ilocos Sur. Kadagiti Ilokano, ti dap-ayan ti lugar a pagtataripnongan dagiti bumario. Agserbi ngarud daytoy Dap-ayan ti GUMIL a disso a pagtataripnongan dagiti mannurat nga Ilokano a pagbibinninglayanda iti kapampanunotan mainaig iti pannakapasantak ken pannakasalud ti arte ken kultura ni Ilokano, nangruna iti literatura ti puli. Tampok iti kombension dagiti panagpapatang iti literatura, sali...

Indauluan ni Leah Manzano, tubo ti San Antonio, Candon City, Ilocos Sur dagiti nangabak iti salip iti sarita a para ubbing ti Umuna a Premio GUMIL Filipinas. Nagturpos iti Edukasion iti University of Northern Philippines ken mangisursuro iti Ingles iti Nagtablaan National High School, Sta. Lucia, Ilocos Sur ken agsursurat iti Liwayway, impangabak ni Manzano ti saritana a “Dagiti Dua a Lelangko”. Umawat iti P7,000.00 ken Sertipiko ti Pammadayaw. Dagiti dadduma pay a nangabak: Karina Viola L. Bulong, first year iti Unibersidad ti Filipinas iti Diliman ken maysa a blogger, ti maikadua a gunggona babaen ti saritana a “Ti Apgad”. Umawat iti P5,000.00 ken Sertipiko ti Pammadayaw; Mighty C. Rasing, Philippine Staff ti Division on Ministries with Young People, maysa nga ahensia ti United Methodist Church, ti maikatlo a gunggona babsen ti saritana a “Ti Gurruod ken ti Boksit ni Dario”. Umawta iti P4,000 ken Sertipiko ti Pammadayaw. Mayawat dagiti premio bayat ti umuna a rabii ti Dap-ayan 2011, ...

Impaulog ti Regional Office ti Department of Education, Tuguegarao City itay nabiit ti direktiba a naiturong kadagiti amin a Division Schools Superintendents iti Cagayan ken Isabela tapno igunamgunamda kadagiti amin a mangisursuro ken estudiante iti elementaria ken sekundaria iti Tanap tapno agdengngegda iti programa iti radio a “Ngayed ti Kannawidan” a maipatpatangatang iti DWPE Radio ng Bayan Tuguegarao (729 khz) iti kada Sabado manipud iti 7:00 a.m. agingga iti 8:00 a.m. Panggep ti programa a kas pagtaudan ti nayon nga impormasion maipanggep iti lokal a historia, kultura, arte ken turismo kas pangparugso iti pannakaisaknap, pannakasaluad ken pannakapasantak ti kultura iti Amianan a Luzon a kas paset ti sangapagilian a kultura. Mausar iti programa dagiti nadumaduma a lengguahe iti rehion ngem maipangruna ketdi ti Iluko, ti lengguahe a maar-aramat a pannakarangtay amin nga agnaed iti Tanap ti Cagayan. Kangrunaan a resource person iti programa ni Dr. Jim P. Domingo nga ad-adda nga am-a...

Duapulo ket dua a sarita ti naisalip iti Salip iti Sarita a Para Ubbing ti 1st Premio GUMIL Filipinas idinto a 7 met a set ti dandaniw ti naisalip iti Salip iti Daniw a Para Ubbing ti 3rd Cabie PINILI, kas impakaammo ti Secretariat dagitoy a pasalip iti literatura. Dagiti sarita a naisalip iti 1st Premio GUMIL Filipinas: “Ti Palasio ti Nanyacalama” ni Lakay Usting; “Maysa a Tedted” ni Jesse T. Abella; “Ti Ullaw ni Yoyo”; “Ti Pakasaritaan ti Bunga ti Mangga” ni Christynne Acacio; “Iti Kasangay ni Pitong” ni Julianne Il. Cano; “Bartonilo” ni Markus Pentogu; “Ni Dangandangan” ni Dang; “Ti Aso ti Baknang” ni Wowie Labrador; “Ti Gurruod iti Buksit ni Dario” ni P.A. Lamon; Ni Turko ken ti Ipusna a Nataraki” ni No Duduaem Man; “Tagapulot” ni Aryong; “Ni Gampor ken ni Biniding” ni Red dela Cruz; “Ni Apgad” ni Kai; “Da Kalkalammot ken Lawwalawwa, ken ti Nuang”ni Wikikkik; “Apay nga Adda Ipus ti Buaya?” ni Lolo Basyong; “Ti Pawad A Piek” ni Sigking; “Ti Engkantada Nga Agduyos Iti Chicken Joy” ni...